Yiu di Corsou asesina na Hulanda cu arma cu a drenta di contrabanda den fiesta Caribeño

ROTTERDAM /WILLEMSTAD.- Ketu bai outoridatnan hulandes ta investigando e asesinato di e yu’i Kòrsou Ardilles “Rilles” Gerard (42) den anochi di 1 pa 2 di febrüari último na Hulanda. Outoridatnan di Hulanda a asta manda pidi Kòrsou pa yuda duna tep si sa ken a kometé e echo akí. Polis ta sospechá ku e arma ku kual a tira Rilles mata durante di un fiesta Karibeño den e sentro Sunrise na Rotterdam, lo a drenta di kontrabanda den e lugá. Pa evitá ku ora pasa ku e arma dor di porta, e detektornan por reakshoná riba esaki, òf e personal di seguridat topa ku e arma di kandela, polis ta pensa ku esaki lo a keda entregá dor di e hèkinan di den banda dje sentro di fiesta. Abase di imágen ku polis tin, por mira dos hòmber ta para masha korto na hèki dje edifisio. Parse nan tabata para ta oriná, i kisas lo a kumindá un persona. Sinembargo tin un opshon ku e arma a keda duná na via di hèki pa duna un konosí ku tabata den e fiesta paden. Polis ta buskando ketu bai hende ku por sa mas di e kaso akí, i kon e arma di kandela a drenta den e sentro di fiesta.

Rilles di Hoorn posiblemente ta un víktima inosente ku bala a alkans’é mortalmente. Miéntras ku un grupo grandi di hende ta para fiesta den e sentro, den kareda di 4’or di mardugá, e tiroteo a tuma lugá den e sentro. Un hòmber di 24 aña di Amsterdam tambe a haña bala, pero a skapa. Rilles a fayesé den hospital. Djis despues di e fiesta, outoridatnan polisial a detené un hòmber di 43 aña, pero a pon’é den libertat. Loke ku por mira riba imágen ku “Opsporingsverzocht” a pasa ayera, por mira ku tabatin dos hòmber pará na hèki, despues ta bin dos otro hòmber mas. Nan tambe ta pará na hèki, i despues ta sigui kana pa drenta e sentro. Despues dje tiroteo, por mira tres hòmber ta sali for di e sentro, i ta kana masha duru bai. Tin un persona ta bai nan tras, pero un dje tres hòmbernan ta saka arma lòs riba e otro hòmber ku ta kore pa su bida. Un dama ku tabata para pafó a skapa, i kisas e no tabata sa mes kiko ta pasando ora e hòmber a tira riba e otro. Polis ta sigur ku esnan den e imágen ku ta kana duru bai, tin algu di haber ku e kaso. Pero no ta ekskluí ku posiblemente nan mes a tira den e sentro. Polis ta trahando duru riba e kaso akí. Tin alrededor di 20 reshèrshi trahando riba e kaso akí. NOTA: Texto ta scirbi den Papiamento fonetico di Corsou.