Ex politico hulandes cu a yega di yama Aruba pa un ‘roversnest’ a fayece

DEN HAAG - Ex lider di VVD Frits Bolkestein cu a yega di yama Aruba como un ‘roversnest’, a fayece na Laren na edad di 91 aña.  E tabata malo pa algun tempu y a fayece ayera den Rosa Spier House, caminda e tabata biba for di 2022. E entiero lo tuma lugar den priva.

ROVERSNEST

Tabata na 1996 durante su bishita na Aruba como lider di fraccion di e partido VVD, cu e la yama Aruba ( y despues tambe e otro islanan di Caribe Hulandes) pa un ‘roversnest’, traduci pa ‘un cueba di atracado’. Durante un entrevista cu Tito Lacle na su salida for di Aruba, e la bolbe ripiti esaki. Su base di e acusacion tabata tur e mal scenarionan cu Aruba tabata experencia e tempo ey segun e ex politico. E declaracionan a pone cu Aruba no a aprecia e ‘gesto’ aki mucho hopi. 

CARERA

Di 1990 pa 1998, Bolkestein tabata lider di partido y lider di grupo parlamentario di VVD den Tweede Ka,mer, unda el a duna e partido un perfil skerpi. Entre 1990 y 1994, Bolkestein tabata lider di oposicion kontra e gabinete di centro-izquierda Lubbers III. Na 1994 el a yuda forma e prome gabinete lila cu PvdA y D66. El a keda den Tweede Kamer despues, caminda e tabata critica e gabinete regularmente. VVD a gana tur eleccion den cual e tabata lider di partido. Na 1998 e partido a gana 38 asiento, cual tabata e miho resultado den historia di VVD e tempo ey.