Tin huma blanco pa loke ta formacion di gobierno nobo

ORANJESTAD – Tin huma blanco pa loke ta e proceso di formacion di un gobierno nobo. Noticiacla a compronde cu inoficialmente e partidonan AVP y FUTURO a haya otro y ta cla pa formalisa nan acuerdo e siman aki. Inoficialmente pasobra e ta bira oficial te ora cu e keda presenta na Gobernador di Aruba, SE Alfonso Boekhoudt cu por sosode mayan diabierna despues cu e dos formadornan topa cu Gobernador. E detayes completo no ta conoci, pero loke si por bisa ta cu despues di un bay bin henter e siman aki, partidonan a keda cla si, y awor mester anuncia e lista oficial di cartera di minister, pero mas importante, e detaye di e programa di gobernacion di e gabinete. E no tabata un proceso facil, Noticiacla a compronde, pero, awor si ta cla y lo tin un gabinete nobo. Tin varios lista cu ta circula di e carteranan y ken lo bira e respectivo ministernan pa e respectivo partidonan. 

E ultimo ‘version no confirma’ cu ta circulando di esey ta 

1.⁠ ⁠Mike Eman - Ministro Presidente

2.⁠ ⁠Mike de Meza  - Ministro di Energia, Infrastructura y Medio ambiente

3.⁠ ⁠Wendrick Cicilia - Ministro di Turismo, Transporte y Cultura

4.⁠ ⁠Mervin Wyatt Ras - Ministro di Asuntonan Social y Salubridad Publico 

5.⁠ ⁠Geoffrey Wever - Ministro di Finansa y Economia

6.⁠ ⁠Gerlien Croes - Ministro di Educacion, Innovacion, Relacion den Reino y Deporte

7.⁠ ⁠Arthur Dowers - Ministro di Husticia, Immigracion y Integracion

Marlon  A .Sneek ~ Presidente di Parlamento

SCREENING

Loke ainda falta ta e screening di e candidatonan pa e respectivo posicion di minister. Esaki lo tuma su tempo y por dura pues un rato. Si e screening pa formador mes a dura casi 3 siman, cu tabata un proceso mas ‘liviano’, e screening pa minister ta hopi mas intenso y consecuentemente mas largo. Por spera sigur entre tres pa cuater siman mas, prome cu por keda cla, te pa huramenta e ministernan nobo.