Venezuela a propone creacion di ruta maritimo cu Aruba pa comercio di galiña

CARACAS - Durante un reunion na Venezuela den cual instancianan gubernamental a delinea proposicionnan pa encurasha produccion y exportacion di cuminda nacional, Federacion Nacional di Cria di Galiña (Fenavi) a propone creacion di un ruta maritimo entre Venezuela y Aruba pa mercadeo di galiña. Esaki ta interesante mientras cu Aruba ta ‘bezig’ cu Colombia pa cuminsa importacion di carni. 

Francisco Tagliapietra, representante di Fenavi na e reunion, a indica cu e ruta lo incluí creacion di protocolnan di salud estricto pa prevencion y vigilancia di griep di parha.

E intencion di e ruta aki ta pa exporta productonan di galiña pa Aruba, ya cu segun e Minister di Agricultura, Menry Fernández, ta anticipa un aumento den produccion di e artículo aki pa e aña aki.

“Ta premira cu e sector aki lo crece cu 8% pa 2025, contribuyendo na e seguridad di cuminda di e pais y generando divisa pa medio di exportacion”, segun Fernández.

E reunion, cu a participa e hefenan di e Ministerionan di Pesca, Alimentacion y Agricultura, a trece dilanti e tema di busca mecanismonan pa reemplasa importacion, aumenta exportacion y optimalisa procesonan economico cu ta garantisa mayor produccion di cuminda, segun un nota di VTV.