Na Corsou, lider ainda deteni di KEM mes lo encabesa e partido

WILLEMSTAD.- Sea ku Michelangelo “Lo” Martines ta den libertat òf e ta detené ainda, e ta esun ku lo enkabesá e lista di partido KEM. Esei  por a komprendé for di un deklarashon di e alto dirigente i konseho dje partido, sr. Anthony Godett. T’asina ku  a aserka sr. Godett pa sa kiko ta status dje lista di KEM, prinsipalmente awor ku su lider polítiko sr. Martines ta den detenshon.

Segun sr. Godett, un kos tur hende por ta sigur di dje, e lista di KEM di un forma indiskutibel lo sigui ku sr. Martines komo lider polítiko pa e próksimo elekshon.

Seguidamente nos a puntra sr. Godett kon e komposishon dje lista di KEM lo ta, esta, ken mas lo aparesé i el a pidi indulgensia pa partido anunsiá esei mas despues den siman. KEM su lista ta práktikamente kla kaba i e eksponentenan lo ser anunsiá i presentá durante un enkuentro ku prensa e siman akí. E lista lo ta formá pa 29 persona.

Segun Godett, echo ta ku na momentu ku KEM a drenta den gobernashon, den tiki tempu hopi di esnan den nesesidat ku pa hopi tempu no a haña nada, awor si a mira ku tin atenshon pa nan situashon. Den esaki el a referí na e.o. e proyekto di rekonekshon i awa i koriente di personanan ku tin hopi tempu deskonektá. Tambe bashí premi ku kobradónan di ònderstant a kaba di risibí.

Mas aleu tambe nos a puntra sr. Godett si lo bai tin karanan nobo, i el a konfirmá ku esei lo ta e kaso. Segun e miembro nobo di KEM den Parlamento di Kòrsou, lo tin no solamente karanan nobo pero kara i hendenan ku inteligensia, hendenan ku sèn i hendenan ku por hala voto. Komo un persona ku konosé polítiko di hopi tempu kaba, segun sr. Godett den polítika ta e faktornan ei ta konta, pues inteligensia, sèn i voto.

Es mas, bo no sa nunka ku historia por ripití, den e sentido ku personanan ku tabata oprimí na aña 1969, lo por bini i rematá den elekshon. Es mas, e propio Anthony Godett tin prueba di esei ora ku el a keda detené na prinsipio di añanan 2000, bai prizòn, i pa despues ku e rekobrá su libertat e hasi historia den elekshon. Den e elekshon ei pa Konseho Insular partido Frente Obrero Liberashon 30 di mei a optené no ménos ku 8 asiento. E simpatia ku el a gana e tempu ei tabata algu indiskutibel. Ku tempu kosnan a bin kambia i awe sr. Godett ta e konsehero prinsipal di sr. Martines.

Bou dje sirkunstansianan aktual den e kaso di Martines tin elementonan ku ta kasi idéntiko, i lo por surgi un ripitishon dje drama di pasado. Manera ta konosí, na luna di novèmber sr. Martines siendo miembro di Parlamento di Kòrsou a keda detené pa su supuesto envolvimentu den kasonan di trafikashon di droga i labamentu di plaka. Martines a para riba su inosensia, pero te awe te será. NOTA: Texto ta scirbi den Papiamento fonetico di Corsou.