ORANJESTAD – Den oranan di traimerdia, a toca lidernan local, regional y internacional pa presenta na e ceremonia di entiero di Aruba su prome premier, mr Henny Eman. Entre nan, tabatin ex prome ministernan di Antias Maria Liberia-Peters y Emily de Jongh-Elhage, ex minister Tico Croes, y den representacion di gobierno Hulandes y Hulanda, ex premier Jan-Peter Balkenende cu awe ta Minister van Staat. Cada uno, riba nan forma y dependiendo nan experiencia, a comparti nan pensamento y palabra na tur esnan presente. Tambe den representacion di gobierno di Aruba, Xiomara Maduro a hiba palabra. Y na final, yiu homber mas chikito, actual lider di partido AVP Mike Eman, a cera e ciclo di discurso, cu un discurso emotivo, y sigur hopi emocional na final. Na final, tabatin posibilidad pa sigui condoleer pa despues e parti misal tuma lugar pa finalmente hiba Henny Eman na su ultimo lugar di sosiego. Cu Henny sosega na Paz.
ORANJESTAD – Un dia despues di a bishita Aruba, e barco crucero Rotterdam di Holland America Line, a raporta un brote di malesa gastrointestinal riba su nabegacion actual cu mas cu 100 pasahero malu abordo. Di acuerdo cu e Centronan pa Control y Prevencion di Malesa (CDC), Rotterdam di Holland America Line tin 107 invitado malo abordo di su biahe actual cu a sali dia 2 di februari 2025. Segun informe, 12 miembro di tripulacion tambe ta malo.
BOGOTA – Un grupo di ciudadano Colombiano a keda deteni pa agentenan di imigracion.Esaki segun e portal pluralidadz.com. Segun e relato, no ta specifica mucho si di ki tempo esaki a sosode ni cu cuanto hende. Solamente cu un grupo di agente di biahe Colombiano a raporta di ta victima di trato inhusto y arbitrario di autoridadnan di inmigracion di Aruba. Loke ta hala atencion, ta cu e accion aki a logra hala atencion di medionan Colombiano, poniendo un tinte negativo riba nos servicio di imigracion.
ORANJESTAD - Diaranson 13 di Februari 2025, Wikipedia riba Aruba lo lansa oficialmente cu un evento di apertura na Biblioteca Nacional Aruba. E proyecto aki, cu ta dura 18 luna, tin como meta pa educa e comunidad local riba e poder di Wikipedia, forma un comunidad activo pa comparti conocemento, y mustra e herencia rico di Aruba riba un plataforma global.