IN MEMORIAM HENNY EMAN

Scirbi pa Johan Sjiem Fat 

1.         Henny, despues di su ruman muhe y ex notario Chuchu, tawata e jiu mayor di Shon A Eman, lider di AVP den añanan 60.

2.         Ora cu Chuchu na edad di 18 aña a bay studia pa bira notario na Universidad di Leiden na Hulanda, Shon A a insisti cu Henny cu tawatin 15 aña e tempo ey compañele pa cuide, pasobra e tawata e “homber mas grandi” den e rumannan.

3.         Na aña 1967 Shon A a fayece, lagando su esposa Sra. Blanche Eman atras cu 7 jiu.

4.         Henny despues di a caba su scol secundario tambe a bay studia derecho na Universidad di Leiden. Sinembargo pa yuda paga pa su studio y pa cria su mama y rumannan menor, el a lanta no menos cu tres cafe ( de Bontekoe, Maraport y het Keizertje) y un restaurant (La Bota) cu e tawata maneha. Chuchu tambe a yuda maneha un di e cafenan.

5.         Na fin di añanan 70 Henny a regresa bek na Aruba y a tuma over liderazgo di partido AVP. E partido e tempo ey tawata pasando den su pio momentonan y a logra di haña solamente 1.200 voto den su ultimo eleccion. Partido MEP, bao liderazgo di Betico tawata domina politica na Aruba. Henny a reorganisa y a “build up” e partido atrobe.

6.         Na aña 1985 AVP, danki na esfuerzonan di Henny, a gana eleccion y Henny a bira e promer Minister Presidente di Aruba na comienso di Status Aparte na aña 1986.

7.         Henny a lidera tres gabinete di coalicion den e añanan siguiente. Su estilo di maneha tawata eficiente y “no nonsense”. E no tawata tolera blackmail ni actonan contra ley di su partnernan den coalicion.

8.         Henny a logra hopi cos grandi y importante pa Aruba, entre otro:

a.         Ora cu Hulanda a bay di acuerdo pa duna Aruba su Status Aparte, Hulanda a mara esey na e condicion cu e Status Aparte lo bira un fase transitorio caminda pa independencia di Aruba 10 aña despues na 1996. Henny a logra convence gobierno Hulandes cu Aruba su derecho di autodeterminacion tawata encera tambe e derecho di keda miembro di Reino Hulandes. Henny a haña sosten di partido CDA pa su lobby, entre otro di Prof. Ernst Hirsch Ballin, ex Minister di Justicia y experto den ley constitutional. Danki na e esfuersonan aki di Henny, e fecha di independencia di Aruba a wordu kita for di Statuut y Arubianonan a logra mantene nan paspoort Hulandes y Europeo (EU).

b.         Ora cu nos refineria a sera y Lago a bandona Aruba, Henny a percura pa crecemento grandi di nos sector turistico, atraendo cadenanan manera: Sonesta, Marriott Hotels, Marriott Vacation Club, Radisson y Hyatt Hotels pa bin establece nan mes na Aruba pa asina yena e bashi cu Lago a laga atras den nos economia, mercado laboral y entradanan fiscal di gobierno.

c.         Ora Hulanda tawata keha di traficacion di droga procedente di Colombia via Aruba y Corsow, Henny a logra convence Hulanda pa yuda establece Kustwacht pa nos islanan pa asina combati traficacion di droga na un manera efectivo.

d.         Henny a introduci AZV pa garantisa acceso na cuido medico ariba un base di igualdad pa tur ciudadano. Aruba tawata e promer pais den Caribe cu un seguro medico general. Prome cu introduccion di AZV esnan cu tawata sigura door di companianan di Seguro y esnan cu por a paga pa cuido medico for di nan mesun saco tawata haña trato medico di primera clase. Esnan cu no tawatin placa of cu tawata haña carchi PPK di gobierno no tawata haña trato medico igual y apropia.

e.         Henny tambe a convence Hulanda pa cambia e sistema di “ontwikkelingshulp” unda Aruba mester pidi financiamento pa cada Proyecto apart den un Fondo di Desaroyo (FDA) maneha pa AIB Bank N.V. den cual Hulanda y Aruba a inverti AWG.500.000.000 conhuntamente y cu a financia un cantidad di proyecto social y di infrastructura.

f.          Henny tambe a redobla pensioen di behez.

g.         Henny tambe a logra di transforma partido AVP den un partido cu un base ideologico solido pa deal cu e retonan di goberna nos pais y a sa di pasa e partido over na e siguiente generacion di lidernan.

h.         Henny nunca a abusa di su poder pa enrikece su mes of su famia y amigonan. Despues di retira di politica activo, Henny a yuda maneha EMCO, e compania cu tawata produci T-shirts unda varios ruman di dje y otro miembronan di partido AVP tawata traha.

9.         Den su ultimo añanan Henny tawata biba di su pensioen, den un cas modesto den cunucu na Jaburibari unda e tawata planta boonchi y pinda. E tawata core su Toyota Land Cruiser di casi 30 anja bieuw ainda pasobra e nunca tawata interesa den placa y luho.

10.       Henny tawatin un amor grandi pa nos isla y e tawata sa di entusiasma, inspira y influencia no solamente Arubianonan, pero tambe politiconan y gobernantenan Hulandes pa yuda contribui na bienestar di nos pais.

11.       En corto, Henny tawata un gran politico y estadista cu integridad indiscutibel, cu vision, cu un energia enorme y cu talentonan diplomatico superior.

Aruba a perde un gran politico y estadista y nos lo sinti su falta.