Yiu di ex minister a agredi reportero y a keda deteni

ORANJESTAD – Awe nochi, yiu di ex minister Endy Croes (MEP), esta J.Croes  ta deteni, despues di a agredi reportero di 24ora Nelson ‘Speed’ Andrade fisicamente. Segun informacion policial, tabata diabierna atardi cu central di polis a wordo informa cu un miembro di prensa a wordo maltrata. Esaki a tuma lugar den e hanchi banda di Bohemia restaurant na Palm Beach. Na salida di e ex minister for di e warda di polis na Shaba, contestando e reportero di 24ora.com, a bisa cu esaki ta un contesta riba agresion verbal. "Agresion verbal a haya awe su resultado", e ex minister a contesta e reportero, indicando cu esaki tabata algo cu tabata cushina pa basta tempo y cu awe a resulta den e agresion. 

REPORTERO

Segun e vocero di polis Liliana Rasmijn, e prome informe ta cu un miembro di prensa di fam A.  tabata sinta den su auto. Na dado momento un homber desconoci a agredi e miembro di prensa y a sali na careda core bay.  Personanan cu tabata hunto cu A. a bay su tras pero a perde di bista. 

ARNHEM

Altocomisario di Polis sr.Arnhem tambe Recherche a presenta na hospital na unda e miembro di prensa a declara kiko a sosode.

Altocomisario di Polis sr.Arnhem ta condena e hecho lamentabel aki.   “No ta acepta cu un miembro di prensa ta wordo agredi y tampoco ningun otro persona. Violencia nunca ta e solucion, menos contra miembro di prensa.” Arnhem ta condena e acto aki. 

DETENI

Mientrastanto e sospechoso un rato pasa a wordo deteni na warda di polis Shaba, despues di a caba entrega su mes, acompaña pa su tata, esta e ex minister Endy Croes.  Cuerpo Policial ta haci un apelacion pa esun cu a wak algo of sa algo yama e tiplijn di polis cu ta 11141. Nos ta garantisa bo ta keda anonimo.