Analisis: Stoelendans politico y Super Ministers!....

Otro siman Aruba ta conoce un constelacion nobo di Parlamento, ora cu gobernador di Aruba SE Alfonso Boekhoudt huramenta 21 parlamentario cu a keda eligi na December ultimo. Cu esaki, ta bin un situacion peculiar (atrobe) unda cu un grupo di 5 parlamentario por tin dos funcion pareu. Esta esun di parlamentario y esun cu nan tin actualmente, esta esun di minister demisionario. E 5 personanan aki, segun ley, por keda un maximo di 3 luna ta eherce ambos encargo. Despues di e tres lunanan (pa mas tarda dia 8 di april venidero) nan lo mester dicidi si nan ta keda parlamentario of ta scoge pa keda den e funcion di minister demisionario.

E PERSONANAN

E cinco personan aki ta ministernan demisionario pa MEP Evelyn Wever-Croes, Dangui Oduber, Xiomara Maduro, Rocco Tjon y minister demisionario pa RAIZ Geoffrey Wever. Nan tin e posicion ‘unico’ di carga e funcion di minister (demisionario) y parlamentario simultaneamente. Minister demisionario Ursell Arends no ta limita na 3 luna y por keda demisionario te ora cu e gabinete nobo sinta, y cu tin un minister nobo pa tuma e carteranan over. Pa e personanan cu dobbel funcion, no ta nifica cu nan por cobra dos salario (esta di minister y parlamentario). Nan lo cobra salario di minister solamente, esta un salario, te ora determina si nan ta keda como parlamentario of como minister.

Y DESPUES

E situacion cu ta diferente di e ultimo eleccion, ta cu awor tin un ley di screening di minister, cu lo tuma hopi mas tempo pa keda cla, como cu e screening ta mas extenso. Si normalmente por dura tres luna pa un gabinete nobo sinta, despues cu e candidatonan pa minister a pasa screening, e biaha aki por dura mas cu e tres luna aki. Pa e motibo aki ta surgi un situacion unda cu, door cu probablemente lo tin un cambio di gabinete, esnan di MEP cu ta minister awor, lo scoge automaticamente pa bay den parlamento como cu nan no lo bolbe como minister. E excepcion entre tur e ministernan demisionario, ta esun di Geoffrey Wever, kende casi sigur lo bolbe como minister den e siguiente gabinete, aunke no ta conoci ki cartera e lo haya bou di su encargo. Di otro banda, si pa un of otro motibo, e formacion no resulta den un gabinete di signatura diferente, e 4 ministernan demisionario di MEP, tin un chens pa mantene nan funcion di minister despues tambe. Tempo lo bisa, kico e formacion actual di gabinete lo bira, mirando cu tin dos partido (FUTURO y AVP) cu ta negoshando cu otro pa forma e proximo gabinete, pero sin garantia cu esaki lo logra.

SI NO TIN GOBIERNO NOBO AKI TRES LUNA

Tin e posibilidad tambe cu despues di e tres lunanan, ainda no tin un gobierno nobo forma. Y e chens aki ta grandi, mirando cu e candidatonan pa minister lo mester pasa screening (mas extenso) prome. Ni e screening (mas leve) di e dos formadonan no ta cla ainda, corda ora mester screen pa bira minister. Esaki lo nifica cu esnan cu tin dos funcion, mester dicidi cua funcion nan ta mantene. Si e candidatonan di MEP dicidi pa keda den parlamento manera ta premira, y NO tin gobierno nobo ainda, ta dos persona so por keda como minister, esta Ursell Arends y Geoffrey Wever. Hasta si dicidi cu ta miho pa nombra minister demisionario te ora caba di forma e gabinete, lo tin e problema di screening. E candidatonan nobo pa minister demisionario ‘temporal’ tambe lo mester pasa screening. E lo ta interesante pa wak, si Aruba lo conoce dos ‘super minister’ demisionario encarga cu TUR e carteranan di gobierno, si partidonan no yega na un acuerdo lihe pa cuminsa cu e proceso di screening pa candidatonan di minister.