Partidarionan y guardianan di seguridad ta prevení detencion di presidente di Sur Korea

SEUL - Na Sur Korea, polis y fiscal a purba envano durante seis ora pa aresta e presidente surkoreano destitui Yoon Suk-yeol. Un team di SWAT a wordo nenga entrada pa e seguridad di Yoon na su residensia.

Un ordo di aresto a keda emití pa Yoon diamars despues cu el a declara inesperadamente un estado di emergencia militar luna pasa den un intento pa pone Parlamento un banda.

CONFRONTACION

Aunke Yoon a wordo suspende, su team di seguridad ainda tin e responsabilidad pa proteh’é. Decenas di oficial toch a logra drenta e residensia. Segun e agencia di noticia AFP, tabatin un confrontacion cu e guardianan di seguridad di Yoon despues cu e intentonan pa negocia a fracasa.

E team di SWAT a retira pa motibo di preocupacionnan di seguridad. Polis awor lo considera mas pasonan.

Segun e abogadonan di Yoon, cu tambe tabata presente na e confrontacion, e ex mandatario no por wordo deteni na su residencia debi na un ley cu ta stipula cu no por busca e localidad en conexion cu documentonan militar secreto. Yoon no a bandona su residencia for di 12 di december.

E ordo di aresto pa Yoon ta caduca dialuna. Si e wordo captura, autoridadnan lo tin 48 ora pa interogu’e y determina si tin suficiente base pa ten’e mas largo.