Homber naci na Corsou ta deteni pa 3 tiroteo fatal na Hulanda

ROTTERDAM - E sospechoso ku polis a detené relashoná ku 3 kaso di asesinato na IJsselmonde ta un hòmber di 24 aña nasé na Kòrsou. E hòmber no tabatin un adrès fiho kaminda e tabata biba. Tambe e ta un konosí pa hustisia na Hulanda.

Anteriormente e sospechoso a haña kondena pa pa enkubrimentu di un ‘scooter’ i komo menor di edat a yega haña kastigu den forma di servisio na komunidat relashoná ku algun kaso di ladronisia. Djaluna otro siman e mester presentá dilanti hues komisario sospechá di asesinato pre meditá òf asesinato i poseshon ilegal di arma.

A detené e sospechoso djaweps anochi 2 di yanüari relashoná ku 3 kaso di tiramentu na IJsselmonde, Rotterdam. Algun ratu promé ku su aresto polis a kontrolá e sospechoso kaba. Pero na e momentonan ei no tabatin motibu pa deten’é pasobra e no a kumpli kompletamente ku e señalamentu di e sospechoso. Asina alto komisario di polis di Rotterdam, Fred Westerbeke a deklará durante di un konferensia di prensa djabièrnè mainta 3 di yanüari.

A para e hòmber den kareda di 7’or di anochi den un negoshi despues ku polis a risibí un tep. A kontrolá su identidat. Tambe a saka un portrèt di dje. Ta a base di e portrèt aki polis a determiná mas lat ta ken eksaktamente ta buskando relashoná ku e kasonan di tiramentu.

A base di investigashon mas aleu a identifiká 2 adrès kaminda e hòmber lo por ta keda i polis a kordiná dos entrada hudisial simultáneo na e adrèsnan aki. A haña e hòmber den un kas na Emelissedijk. Na e mesun adrès a haña alabes un arma di kandela. “Tur kos ta mustra ku ta e arma aki a usa den e kasonan di tiramentu”, bosero di Ministerio Públiko, Hugo Hillenaar a bisa.

Den último 2 siman a tira tres hòmber di 62, 51 i 81 aña na IJsselmonde i tur tres a fayesé a konsekuensia di e heridanan ku nan a sufri. Dos di e víktimanan a risibí tiru den kabes. Ministerio Públiko ta asumí ku e víktimanan di tiramentu ta arbitrario. NOTA: Texto ta scirbi den Papiamento fonetico di Corsou.