Soul Beach Music Festival a cambia Aruba pa St Maarten pa 2025

MIAMI – Soul Beach Music Festival tin un cas nobo! Entrante otro aña na mei (2025), e festival ta tuma lugar na St Maarten y no Aruba. Manera semper e fin di siman di memorial weekend, e festival ta tuma lugar. Pero despues di 24 aña, Aruba ta perde e festival aki y St Maarten ta bira su anfitrion. Diasabra anochi e promotor Mark Adkins a confirma esaki pa Noticiacla, despues cu un siman prome e la confirma e sitio. Pero ta diasabra e por a nombra e sitio oficialmente. E lineup si ainda no ta conoci y lo bira conoci fin di januari di 2025. 

PROBLEMA CU ARUBA

Tabata for di juli di e aña aki, algun siman despues cu e festival a tuma lugar na Aruba (pa di ultimo biaha) cu Adkins a confirma cu e no ta bolbe Aruba. ‘Aruba a dicidi pa no extende nos partnership’. Cu e frase aki, organizadornan di Soul Beach Music Festival despues di 24 aña a bisa cu e festival a yega na su final pa Aruba. Noticiacla tabata e prome pa toca e tema aki na juni pasa, ora cu a publica un carta di e organizador Mark Adkins na ATA, puntrando kico e motibo ta pa cual no tin comunicacion mas. E tempo ey, a compronde di ATA cu tin un otro intencion pa cu festivalnan na Aruba y cu esaki lo a keda informa na e organizadornan tambe. Sinembargo segun Adkins, ATA no tabata comunica cu nan kico e cambio ey tabata. Pues nan a keda den scuridad segun Adkins. E ora ey tabata conoci caba cu e festival no ta bolbe Aruba. Pero awor e confirmacion a yega, sin cu tin un declaracion concreto riba e motibo. 

SOCIAL MEDIA

E organisacion a solamente pone un mensahe riba nan website y Instagram cu un gradicimento pa e sosten na e fanaticonan, y cu e mensahe duro cu e festival no ta sigui. 

LUGAR NOBO

E festival lo a sigui, solamente otro caminda, cu no ta Aruba. “Soul Beach lo muda pa un destinacion nobo y exitante pa 2025” e mensahe ta bisa. Pa mas info por click riiba https://soulbeach.net/