Debi na impase pa reconoce Maduro como presidente, frontera cu Venezuela ta keda cera te April 2025

ORANJESTAD - Debi na un impase pa reconce Nicolas Maduro como presidente di Venezuela, frontera cu Venezuela ta keda cera te April 2025. Asina gobierno di Aruba a duna como motibo pa cual a dicidi di prolonga e ciere di frontera cu Venezuela. Noticiacla recientemente tabata e prome cu a haci mencion di e prolongacion di e cierre, y awe gobierno a confirma esaki, indicando tambe e motibo specifico.

FRONTERA CERA

Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.

Reunionnan interno ta tumando luga pa un tempo caba pa prepara pa e apertura di frontera aereo, pa sigura un reapertura sigur y na forma responsabel.

Mientras tanto a surgi un impase riba e reconocemento di Nicolas Maduro como presidente nobo. Reino Hulandes, como parti di Union Europeo no ta reconoce e victoria di Nicolas Maduro tanten e no prueba e victoria cu actanan. Mientras tanto oposicion na Venezuela si a presenta actanan cu ta demostra cu nan candidato Edmundo Gonzalez, ta e ganado di eleccion na juli ultimo. Pa e motibo aki e ciere di e frontera cu Venezuela ta keda prolonga cu maximo di 4 luna.