Ministerio Publico ta considerando ainda si lo apela den caso di periodistanan condena

ORANJESTAD – “Ministerio Publico ta considerando ainda si lo apela” (den caso di e 4 periodistanan condena) diaranson. Asina vocero di Ministerio Publico a reacciona bisando despues di a tende di e sentencia diaranson mainta. Manera ta conoci, corte di prome instancia a dicta sentencia den e caso penal ‘New York’. 

Ta trata di e caso contra e periodistanan Richard .Lacle., Brian Koolman., Norben Giel. y Nelson ‘Speed’ Andrade. E sospechosonan ta wordo acusa di corupcion activo di funcionarionan publico, complicidad di violacion di secreto oficial y participacion den un organizacion criminal durante e periodo di 1 di januari 2021 te 22 di maart 2023. 

E tratamento di diaranson mainta tabata un continuacion di e caso contra e agente policial Vos., kende a wordo condena riba 8 di december 2023 pa 16 luna di prison, di cual 8 ta condicional, pa malversacion, violacion di secretonan di trabao, abuso di su funcion y soborno di parti di miembronan di prensa. Ademas el a wordo prohibi di eherce e trabao di polis pa e duracion di 3 aña. Ministerio Publico a bay den apelacion contra e sentencia aki.

Corte a absolve e sospechosonan di participacion den un organizacion criminal. Brian Koolman a wordo declara liber di corrupcion activo di funcionarionan publico, conforme solicitud di Ministerio Publico.

E otro tres sospechosonan a wordo condena pa corupcion y e cuatro sospechosonan a wordo condena pa complicidad den violacion di secreto oficial di trabao. Teniendo na cuenta e absolucion di participacion den un organizacion criminal, e castigonan imponi ta bao di e castigonan exigi pa Ministerio Publico.

Brian Koolman  a haya un castigo di trabao pa comunidad di 150 ora y ademas un castigo di prison condicional di 3 luna cu un tempo di prueba di 3 aña. 

Richard Lacle y Norben Giel a haya un castigo di trabao pa comunidad di 240 ora y ademas un castigo di prison condicional di 12 luna cu un tempo di prueba di 3 aña. 

Nelson ‘Speed’ Andrade a haya un castigo di prison di 6 luna y ademas un castigo di prison condicional di 12 luna cu un tempo di prueba di 3 aña.

Ministerio Publico ta interpreta e sentencia cu Corte ta tuma e sospechosonan na malo cu nan a intercepta comunicacionnan confidencial di radio di Polis di Aruba aparentemente pa interes propio, beneficio economico y/o sensacionalismo. Door di haci esaki, a viola privacidad di ciudadanonan di Aruba y a causa posible riesgonan y peligronan pa e ciudadanonan, Polis y sociedad.  

Tambe segun OM, Corte a tuma na cuenta tambe e actitud procesal di e sospechosonan na momento di determina e haltura di e castigo.  De Andrade a haya e castigo mas halto pasobra el a wordo condena anteriormente pa hechonan similar, y esey no a strobe pa bolbe comete delitonan di e mes indole.

Ministerio Publico ta considerando ainda si lo apela. Tanto Ministerio Publico como defensa tin 14 dia pa tuma e decision aki.