MEP dispuesto pa traha cu tur partido cu a ricibi asiento!

ORANJESTAD – “E pregunta crucial tabata si nos ta dispuesto pa forma un gobierno. Nos contesta tabata si”, tabata e prome reaccion di lider di partido MEP Evelyn Wever-Croes na salida for di su reunion cu informador diaranson mainta laat. Interesante ta cu riba e pregunta cu si MEP ta dispuesto pa sinta cu tur partido cu a ricibi asiento MEP a bisa cu no ta exclui ningun partido cu a ricibi asiento. Esaki ta interesante pasobra den pasado MEP a bisa di lo no traha cu AVP, y awor e ta un di e partidonan tambe cu a ricibi asiento. Pero segun Wever-Croes, e cambio ta debi cu pueblo a papia palabra cla y a duna AVP e mandato di partido mas grandi. 

ALINEAMENTO MEP FUTURO

Segun Wever-Croes, a haci un estudio y compara e programanan cu esun di partido FUTURO, y ta mira cu 86.6% di e programanan ta mescos, y e diferencianan no ta diferencia cu bo no por surpasa. Ainda falta pa haci mescos, esta analisa e parti di programa cu PPA pa wak e compatibilidad, pero no ta mira mucho diferencia tampoco. “A papia basta rato di esey” Wever-Croes a bisa.  

NO A PAPIA CU PARTIDO

Mientras cu MEP ta dispuesto pa goberna, e no ta sinti cu nan ta yama pa inicia esaki y como tal a bisa cu no a haci acercamiento cu otro partido individualmente pa sondea e posibilidadnan.