Eman: No tin ningun obstaculo pa stroba un gobernacion AVP-FUTURO

ORANJESTAD – Partido AVP a informa informador Tisa LaSorte diamars mainta cu nan escogencia ta pa traha cu partido FUTURO y no cu MEP. Asina e lider di partido Mike Eman a bisa noticiacla na salida di nan reunion cu e informador. Segun Eman, no tin ningun obstaculo pa stroba un relacion cu FUTURO, incluso cu no tin ningun ‘breakpoint’ pa stroba e trahamendo hunto aki.

HOPI COS COMUN

Segun Eman, conforme e programa di FUTURO, tin hopi cos, pa no bisa tur cos cu ta en comun cu e partido berde. No mas, tin cu streamline e urgencia di e puntonan aki. Cu esey, Eman kier men cu porta Eman kier pa cierto punto keda realisa mas prome, y FUTURO kier otro tema haya mas urgencia. Pero segun Eman, tin un vision comparti entre e dos partidonan y awor tin cu simplemente e termino pa logra esaki. E hecho cu riba caya ta papia cu AVP lo no sucumbi pa e 700 florin di aumento pa pensionado, tambe Eman a bisa cu por papia ariba, pa wak kico e cifranan ta duna pa e aumento bira. Pues por compronde cu no necesariamente ta wanta na e cifra di 700 manera cu a priminti durante campaña. “No tin nada cu ta principialmente contra” Eman a bisa di e parti di FUTURO. 

NO NA MEP

Di otro banda, AVP a cera tur posibilidad pa un eventual gobierno a base amplio, trahando hunto cu partido MEP. “Nos a bisa informador cu nos no ta mira e posibilidad pa traha cu MEP” Eman a bisa noticiacla specificamente riba e tema ey, contestando pregunta di Noticiacla. Segun Eman, e direccion cu partido AVP kier hiba Aruba ta ‘completamente diferente’ cu partido MEP y como tal no ta kere cu MEP ta dispuesto pa ‘colabora’ cu AVP pa logra e loke cu e partido berde kier logra. Y como tal, a bisa informador cu AVP no ta dispuesto pa traha cu partido MEP den un futuro gobierno.