Miguel Mansur di ACCION21: Pueblo a vota pa cambio y Aruba a gana

ORANJEStAD – “No ta e resultadonan cu nos a spera pero mi ta contento cu pueblo a vota pa cambio, Aruba a gana”, tabata e prome reaccion di parlamentario y lider di partido ACCION21, Miguel Mansur. Su partido a perde su unico asiento y no ta bolbe Parlamento otro aña. E la haya 2204 voto e biaha aki, cu ta 408 faltando pa sigura e asiento. 

CONTENTO PA GERLIEN.

Mansur ta contento si pa Gerlien Croes, di FUTURO. “Mi ta sumamente orguyoso cu Gerlien a hasi historia i lo sigui hasie”. E ta decepciona si cu a mira un cambio bek den direccion di campaña tradicional i política tradicional.

MENOS PARTIDO

“Mi ta sorprendí cu awor nos tin menos partido den Parlamento y menos asiento pa e partidonan independiente. Mi a spera cu e lo a bai den e otro direccion. E ta kere si cu un coalicion di dos partido cu diesdos asiento ta un fundeshi stabil pa e proximo cuater añanan.

RESTZETEL

Seis restzetels segun Mansur, ta un distorcion asta mas grandi di e boluntad democratico di e pueblo pero como cu e ta beneficia e partidonan mas grandi, ta improbabel cu e lo cambia” e politico a sigui bisa. “Mi ta keda cu speransa cu e gobierno nobo lo entrega riba cambio. Mi ta aprecia e libertad pa dicidi kico e siguiente capítulo mester ta pa mi” e la bisa finalmente.