AVAVIT: Ta descarta reactivacion di vuelonan entre Aruba y Venezuela pa e aña aki

CARACAS - Vicky Herrera de Díaz, presidente di Asociacion Venezolano di Agencianan di Biahe y Turismo (Avavit), a descarta dialuna e posibilidad di reactiva buelonan entre Aruba y Venezuela den e resto di e aña aki, esta 2024, sinembargo, el’a sigura cu nan ta trahando riba e.

Den un entrevista pa Circuito Onda, Herrera a indica cu e anuncio haci door di Prome Minister di Aruba, Evelyn Wever-Croes, tocante e posibel reapertura di vuelonan comercial entre e isla Caribense y Venezuela a genera expectativanan amplio den e sector, pero cu e ta un proceso cu por ta laat.

Wever-Croes a bisa algun dia pasa cu e ta finalisando e tramitenan necesario pa e reapertura aereo di e frontera entre e dos paisnan, como tambe e reactivacion di intercambio comercial y turistico.

Lantamento di e suspension di vuelonan entre Aruba y Venezuela ta un proceso lento.

E representante di Avavit a splica cu lantamento di e suspension di vuelonan ta encera un serie di proceso y proceduranan cu tin e tendencia di tuma basta tempo.

“Actualmente, no tin buelonan programa pa aruba den e sistema”, el’a bisa.

Herrera a destaca cu na momento cu e ceramento di frontera a keda implementa, e aerolineanan cu tabata duna servicio di vuelo riba e ruta entre Venezuela y Aruba a redirigi nan operacionnan pa otro destinacionnan.

Un posibel reaktivashon ta rekerí cu e companianan di aviacion ta wordo autorisa atrobe pa opera riba dicho ruta, loke ta rekerí un seri di proceso pa wordo completa cu por tuma tempo.

“Mi no ta sigur cu tur kos ta kla pa e luna aki di december,” e la conklui.