Analisis: Reforma, reduci, reorganisa un acuerdo acorda cu Hulanda?

Scirbi pa Tito Laclé

Si nos scucha e politiconan di mayoria partido politico e simannan aki durante e campaña politico, e proximo gobierno di Aruba lo bay reforma sistemanan, reduci gastonan, reorganisa departamentonan di gobierno, y transforma e servicio publico den uno husto y eficaz. Tur cos mester cambia, tur cos mester bay otro, y ademas, na final di dia, pueblo lo paga menos impuesto, cobra mas salario y penshun, paga menos pa comestibel, haya tereno pa traha cas, por cumpra cas mas barata, y gastonan diario ta baha (pa menciona algun cos), SIN cu nos debe nacional ta bolbe crece. 

E pregunta ta, mirando cu Gobiernonan anterior no a logra tur esaki, kico ta asina diferente cu awor si e siguiente Gobierno di Aruba por logra esaki? Gobierno tin mas placa? Ta bay tuma otro hendenan di otro capacitacion pa haci e trabounan? Ademas di turismo, tin un otro pilar economico cu por genera mas entrada riba termino cortico? 

Y si di berdad kier reforma, reduci gasto, reorganisa etc., di con mayoria partidonan ta contra di e onderlinge regeling cu Hulanda cu ta haciendo esakinan via di e Landspakket? Tin politico cu te hasta a bisa cu nan ta bay para e acuerdo aki. Mientras cu e realidad ta cu den e Landspakket hopi di e reforma, cambio y reorganisacion cu nan ta primintiendo pueblo TA inclui. Es mas, cu yudansa financiero (parcial) y cu experticio di Hulanda, caminda cu tin falta di esakinan localmente. Un inventarisacion simpel ta haci esaki bisto: mehora nos sistema di finanzas publico (percura pa jaarrekening audita), reforma di belasting (como por ehempel introduccion di BTW), reorganisa aparato gubernamental (baha gasto), atende cu e problemanan structural di mercado laboral (haci algo cu trahadonan ilegal), miho structura di cuido medico, bin cu solucion pa nos hendenan y e sistema den enseñansa, haci algo pa nos entrepreneurs … TUR ta den uitvoeringsagenda di Landspakket.

Ta bon pa tur votado puntra nan mes: kico ta pasa na momento cu e siguiente Gobierno cancela of sali for di e onderlinge regeling y cancela of para e acuerdo pa introduci un ley di reino pa supervision financiero? Ta realistico pa premira cu financiamento di partinan di reforma ta stop; experticio di Hulanda caminda nos tin falta di capacidad no ta keda disponibel mas; interes riba e debe di COVID ta subi; nos debenan externo no ta wordo refinancia via Hulanda contra interes mas abou; e relacion cu Hulanda lo empeora; y e cooperacion na nivel entre ministerionan di Aruba y Hulanda lo fria. Y riba tur esey, e politiconan ta priminti cu tur e reforma y reorganisacionnan lo sigui toch riba propio forsa, y cu nan mesun recurso y capacidad limita.

Den un analisis anterior nos a papia riba un scenario cu un partido por ‘Gana anochi, perde mainta’. E scenario aki ta vislumbra na momento un partido kere cu el a gana y por bay cumpli cu tur e promesanan haci den campaña, pero ta hay’e forsa di traha cu partido cu ta riba trayectoria di colision den Reino. Tambe por perde ‘mainta’ si dicidi di bay traha cu partidonan cu a priminti cu por logra cielo y tera, pero en realidad ta resulta cu tabata promesa fofo y kisas te hasta falso. Y ken ta ‘perde’ si candidatonan a postula nan mes pa bay guia nos pais y resulta cu nan no ta ministeriabel?

Tin un expresion cu nos ta uza na Aruba cu ta bisa: Politica ta cruel. E ta un moneda di dos banda. Palabra ta na e votador diabierna awo, pa castiga e politiconan mediocre, of pa laga su mes wordo castiga door di nan pa e siguiente 4 aña!