Ex minister Glenbert Croes ta kibra silencio cu un video: Pronto lo mi ta bek!

ORANJESTAD – Dialuna anochi ex minister Glenbert Croes a kibra su silencio, mandando un mensahe di video, cu e mensahe principal pa hende vota MEP diabierna awor. Pero mes momento e la sigura tur hende na final cu e palabranan:  ‘pronto lo mi ta bek’, y tambe cu e ta ‘canando su caminda di inocencia’. E video,  ta casi 9 minuut total, pero di cual Glenbert Croes mes ta papia apenas 2 minuut. Bo ta wak e ex mandatario ta cana riba beach cu un camisa heel cu su nomber ariba. E mensahe principal ta pa tur hende, specialmente nos grandinan vota MEP diabierna awor, pa sigura e futuro pa Aruba. Pues e ta un ‘stemadvies’, pa vota pa e partido cu e la forma parti di dje. 

DETENI PA PROBLEMA CU PERMISO

Tabata diamars 8 di october cu landsrecherche a detene Croes na su cas, y a transporte pa Marinierskazerne, y informe cu e ta un sospechoso den caso cu a haya e nomber Portulaca. Ta trata asunto di dunamento di permiso di trabou y estadia. Den e mesun siman, e mester a entrega su retiro como minister y como miembro di partido MEP, conforme regla di partido ora cu bo bira un sospechoso. Pa algo menos cu 2 luna, no a tende nada mas di dje, te cu dialuna anochi cu e video aki a aparece riba FACEBOOK.