Gobierno: Nada a cambia y frontera cu Venezuela ta sigui cera!

ORANJESTAD – E noticia cu a sali den varios medio Venezolano awe diabierna cu Aruba awor si lo ta cerca di habri frontera cu Venezuela, no ta necesariamente corecto.    Asina prome minister Evelyn Wever Croes a bisa Noticiacla diabierna atardi. “Mi no sa si mi tin cu yama esaki un fake news of no, pero Aruba masha tempo ta preparando. Nada no a cambia”, e mandatario a sigui bisa. E raportahe di medionan Venezolano ta usando un declaracion cu e mandatario a haci na un emisora na Aruba, riba e tema. Ta mas sigur cu e declaracion ey a wordo ‘mal interpreta’.  Noticiacla a opta pa usa un di e medionan (di 10, cu a sali).

E DECLARACION

Tabata recientemente cu e prome minister a haci un declaracion na e emisora Kalle 91.5FM na Aruba unda cu e la bisa e.o” Awor ta bay cuminsa cu e negociacion cu autoridad Venezolano. “Aduana, imigracion y aviacion civil di Venezuela y Aruba tin contacto caba,”. Esaki ta algo cu por wordo realisa hopi pronto”, ya cu “nos ta den e fase final, nunca antes nos tabata asina cerca manera nos ta awor.”. No por a difundi, si e ultimo frase aki a wordo bisa door di prome minister tambe of e vice presidente di Camara di Comercio di Coro de Vela, Juan Gotopo. Gotopo ta esun cu a cita prome minister inicialmente. A base di e declaracion aki, tur medio di Venezuela a reacciona y a reproduci esaki diabierna na Venezuela.

REACCION PROME MINISTER

“Nos no ta full cla ainda” Wever-Croes a sigui bisa. Segun e prome mandatario, tin un otro problema cu a surgi, cu ta cu e eleccion di presidente Nicolas Maduro como presidente, no ta wordo reconoci. “Esey mester wordo aclarea prome y e ora nos por continua si nos ta cla na Aruba” e mandatario a sigui bisa. E mandatario a confirma cu e frontera cu Venezuela ta keda cera te por lo menos 24 di December proximo, y no por bisa ainda kico ta pasa despues di e fecha ey. Ta conoci cu prome cu e fecha ey, lo bira conoci si ta prolonga esaki y ta practicamente sigur cu esey lo sosode, mirando cu ainda no tin claridad riba e legitimidad di presidente Maduro, y como tal no por sigui cu e proceso te ora cu esey haya claridad