Planta di tratamento di awa di riool na Parkietenbos a wordo renoba y ta reanuda operacion

ORANJESTAD - Dialuna mainta Prome Minister Evelyn Wever-Croes tabata presente na e apertura di e facilidadnan di e  Planta di tratamento di awa di riool (Sewage Treatment Plan)na Parkietenbos. Prome Minister a indica cu pa falta di mantencion di e facilidad, esaki no por a procesa e desperdicio cu tabata yega. Pa e motibo aki e planta  a wordo sera na Maart 2024.  

Gobierno, mirando e necesidad grandi pa pone e planta aki den funcion, a tuma e decision di privatisa e planta y pone den man di un compania cu tin e capacidad pa inverti y drecha e planta. Gobierno a logra pasa e ley di privatisacion den parlamento y traspasa e propiedadnan pa Aruba Wastewater Sustainable Solutions (AWSS) cu lo encarga nan mes di haci inversionnan necesario.

Prome Minister a indica cu esaki sigur ta un dia importante, mirando cu pa esnan cu ta hiba e awa, specialmente e trucknan di septic tank, esaki ta un alivio grandi ya cu nan no mester bay te Zeewijk mas pa haci esaki. Cu e planta aki habri, e trucknan di septic tank por hiba e sushi na e planta completamente gratis y haya un servicio ta optimal. Cu e machinnan den fucnion atrobe,  por procesa e sushi sin causa molester caul ta e direccion cu Aruba kier bay. 

 Tin aworaki un solucion urgente cu nan a aplica y den 1 of 2 aña ful e planta lo ta cla, y lo haci cu e holo di Bubali Plas ta pasa pa pasado.