OM: Tendencia di ministernan acusa, ta pa culpa OM di persecucion politico

ORANJESTAD – Ex minister Otmar Oduber a tende fiscal exigi un castigo di 3 aña di prizon incondicional contra dje, na fin di e rekisitorio dialuna atardi. Fiscal a cuminsa e rekisitorio, remarcando cu esaki no ta e prome caso di corupcion contra un minister of ex minister. Ademas, a usa e momento pa sigura tur hende cu OM no ta trata un caso asina pa Sali como e ganador, sino un caso asina ta un perdida pa Aruba. Tambe a purba mustra cu contrario na pensamento den comunidad, no ta importa si e persona ta un minister of no. Y mas importante aun, esaki no ta un ‘asunto politico’, sino un caso cu ta trata un politico. Dos cos diferente. 

TENDENCIA SIMILAR

Tambe e fiscal a mustra cu cada caso cu tabata trata di corupcion envolviendo un of otro ex minister of minister, ta varia, pero cu tin un tendencia igual. Esta, cu e minister of ex minister en cuestion, ta pretende cu ta OM ta persiguie politicamente, y/of cu OM kier kibra e politico. “OM ta keda independiente y no tin color politico” e fiscal a purba splica den corte dialuna mainta. 

USO DI PRENSA

Tambe fiscal a mustra tambe cu cada bes e respectivo minister of ex minister, ta busca prensa y publicidad, pa habri afo contra e investigacion. OM sinembargo, a bisa cu e no ta kere cu un caso asina mester wordo trata den prensa. Pesey e caso ta uno publico unda cu den un sala di corte, e caso ta wordo trata, unda cu tur hende por defende nan mes publicamente. “Asina corte ta funciona” e fiscal a sigui bisa.