Ministerio Publico a pidi 3 aña di prizon incondicional pa ex minister Otmar Oduber

ORANJESTAD – Ministerio Publico dialuna atardi a exigi 3 aña di castigo di prizon incondicional pa ex minister Otmar Oduber, relaciona cu e caso penal Flamingo. Ademas cu e no por carga un funcion di ambtenaar y ta perde su derecho pasivo di voto pa un periodo di 6 aña. Fiscal a baha ‘pisa’ riba e ex mandatario, considerando e como, e ‘homber cu e poder y influencia’ cu tabata haci tur cos bira posibel. E otro 4 sospechosonan tambe a tende castigonan exigi contra nan, di cual esun cu uba haya mas castigo exigi, despues di Oduber, tabata considera como su ‘man drechi’ A. Esser, cu a tende un castigo di prizon incondicional di 18 luna. Pa e yiu homber di Oduber a exigi un multa di 25 mil florin, y trabou comunitario di 180 hora. Pa e trahado ‘spirito’, a pidi un castigo di prizon incondicional di 6 luna, mientras cu pa e dama S Croes, a pidi 6 luna di prizon condicional y 240 ora di trabou comunitario.

CORUPCION STRUCTURAL

E fiscal a bisa cu e loke e personanan aki a haci, ta algo impactante y tristo, di e manera con ta anda y haci corupcion. Y cu esaki no ta e forma di haci politica. “Esaki ta un sistema structural di corupcion. Y mester manda un señal fuerte cu abuso di poder, no ta tolerable. Keda pendiente pa un relato mas amplio riba e rekisitorio di Fiscal contra tur e sospechosonan, unda cu a purba pinta un cuadro hopi serio di abuso, corucupcion, estafa y soborno cu a tuma lugar, lidera pa e ex mandatario Oduber. Noticia den proceso.