Na Corsou, Anthony Godett ta huramenta como parlamentario mas nobo di Parlamento

WILLEMSTAD - Anthony Godett lo presta huramentu awe 21 òktober dilanti gobernadó. Esaki ta e mesun dia ku parlamento ta kontrolá su kredensialnan. Godett ta remplasá lider polítiko di KEM, Michelangelo ‘Low’ Martines komo parlamentario pa e partido.

Martines for di 5 novèmber ta den aresto preventivo relashoná ku un investigashon penal kontra su persona. Ta sospech’é di trafikashon di droga i labamentu di plaka. Konsekuentemente dia 15 novèmber el a entregá su retiro komo parlamentario pa asina Godett por drenta.

E desishon aki a kai mirando ku KEM a kaba di duna su sosten na gabinete Pisas II i a postulá un kandidato pa bira minister enkargá ku Desaroyo Sosial, Labor i Bienestar. No ta deseabel òf kisas asta korekto pa nombra un minister nobo miéntras ku parlamentario di e partido ku a postul’é no por ta presente den parlamento. En todo kaso entrante awe 21 òktober Godett lo ta 2’or di mèrdia serka gobernadó pa e hura i asina ofisialmente drenta parlamento i inisiá ku e trabounan parlamentario.

E reunion di parlamento pa kontrolá kredensial di Godett lo inisiá 11’or di mainta. Forma quorum pa e reunion lo no ta un problema mirando ku miembro di parlamento independiente, Corine Djaoen-Genaro for di 15 novèmber ofisialmente a duna su sosten na gabinete Pisas II. Konsekuentemente e koalishon tin sosten di 12 miembro di parlamento.

Tambe lo ta asina ku partidonan PAR, MAN i PNP no ta inkliná pa opstruí proseso demokrátiko i stroba un representante di pueblo pa tuma asiento den parlamento manera a sosodé na 2020 ora ku partidonan di oposishon a nenga di presentá pa reunion di parlamento pa asina Shaheen Elhage (PAR) por a drenta parlamento. Elhage na 2020 asta a entamá un kaso den korte pa hues disidí ku e reunion pa kontrolá su kredensialnan mester tuma lugá.

Godett ya kaba tin algun punto ku e ke bai atendé asina ku e drenta parlamento. E ta bai hasi tur su esfuerso pa habri un diálogo entre e 3 podernan ku trias politica ta basá riba dje, esta e poder legislativo, e poder ehekutivo i e poder hurídiko. “No por ta asina ku un di e podernan aki, esun hurídiko, ta hasi i deshasí manera e ta haña ta bon. Meskos ku tin diálogo entre gobièrnu, sindikatonan i doñonan di trabou mester por tin diálogo entre e 3 pianan di nos trias politica”, Godett ta bisa.

Tambe Godett tin pensá pa manda algun inisiativa di lei pa parlamento. E promé ta un inisiativa pa kambia e lei di screening. Godett ta boga pa pone un tempu máksimo pa e diferente entidatnan di screening presentá nan konseho final riba un kandidato pa minister.

Na su opinion e proseso di screening ta dura demasiado largu. Ta sinta warda riba e diferente konsehonan drenta sin ku e entidatnan ku ta hasi e screening aki ta mará na un término di tempu pa kumpli ku nan trabou. Esaki ta trese konfushon i iritashon, esta Godett.

Otro inisiativa di lei ku ku Godett tin pensá pa presentá kuné ta pa oumentá e “kindertoelage” ku ta gobièrnu ta paga. E ta bisa ku e lei ta data for di mas ku 40 aña pasá i e kompensashon a keda para na 55 florin pa e promé yu. E suma aki, esta Godett, no ta yuda mas mirando kuantu kosto di bida a subi.

Pa loke ta funshonamentu di parlamento mes tambe Godett tin su ideanan. E ta boga pa hasi mas uso di komishonnan fiho pa asina aliviá Komishon Sentral i reunion públiko. Na su opinion esaki lo alsa efisiensia di funshonamentu di parlamento. NOTA: Texto ta scirbi den Papiamento fonetico di Corsou.