Caso Penal Flamingo: Huez a trata e asunto di ambtenaar ‘spirito’ den corte

ORANJESTAD – Durante tratamento di e caso penal Flamingo diaranson mainta, huez a toca e aspecto cu a bin dilanti algun aña atras ora cu ex minister Marisol Lopez a opta pa referi na cierto ambtenaar, como spook ambtenaar, osea ambtenaar spirito. Huez diaranson mainta a considera un ‘spook ambtenaar’, como un ambtenaar cu a haya un contracto di trabou, pero cu no ta presenta na trabou, pero si ta wordo compensa financieramente. Dos di nan, a keda trata diaranson mainta, e conocido locutor H. Geerman y L Phillips. Pa esaki, huez a puntra tanto e sospechoso principal Otmar Oduber y un di e personanan acusa di ta e ambtenaar spirito, Phillips riba esaki. 

GEERMAN

E prome ‘spirito’ trata, tabata e conocido locutor H Geerman, cu mientrastanto a yega na acuerdo cu Ministerio Publico y a paga un suma cuantioso pa no mester presenta mas den corte. Huez a yama esaki ‘getransigeerd’. E huez tabata interesa pa sa con Geerman a yega na bira un ambtenaar pa Oduber. E ex mandatario a sigura e huez cu parti di e situacion ta un amistad di añas cu e tin cu e persona, relaciona cu un interes comun personal, esta ambos tin yiu autista. E la sigura cu Geerman, contrario na declaracionan di esun cu a denuncia e caso, ex minister Lopez, Geerman semper a traha, a haci un bon trabou y cu e por verifica pa e trabou cu Geerman semper a haci. Su ausencia fisico na Cocolishi, tambe tabata splica, pero tur hustifica segun Oduber. Ademas, segun Oduber, despues cu Lopez a bira minister como su reemplasante, Geerman a sigui traha pe tambe, y te hasta a traha pa actual prome minister Wever-Croes, cual situacion e prome mandatario tambe a confirma algun tempo atras. Pues no por papia di un ambtenaar spirito. 

PAGA PA EVITA CORTEHuez despues a puntra Oduber, kico e ta pensa di e hecho cu Geerman a opta pa paga un suma halto pa no tin cu presenta mas den corte, cu si esaki no ta implica culpabilidad y cu por mira esaki cu e la ‘paga’ pa su libertad. Oduber a sigura cu e no por opina riba esaki. Pero mes momento, e por compronde Geerman su accion, pasobra si e mester a presenta den corte, e lo a perde su trabou, y entrada y esey lo tabata funesto pe. Esaki pasobra e tabata depende tambe di su programa radial pa por sostene su famia y esey a bira su unico fuente di entrada. Y Oduber, a compara su propio situacion, bisando cu e caso aki a caba cu su situacion di trabou, y pesey e por compronde e actitud y decision di Geerman pa haci e pago. E suma cu Geerman a paga ta mas di 120 mil florin pa e no mester presenta mas den e caso.

PHILLIPS

Otro ambtenaar spirito cu a keda trata ta e ciudadano L Philips. Segun Oduber, ta e mes a acerca Phillips tempo cu e la bira minister (esta Oduber:red) mirando e coneccion cu Phillips tabatin cu San Nicolas. Y mirando cu Oduber tabata kier a haci hopi cu e districto aki, e la contrata Phillips. Huez sinembargo a cuestiona cu Phillips no tabata presenta fisicamente na oficina na Cocolishi, y tampoco por a presenta prueba documenta di su trabounan haci. Oduber a splica cu e trabou di Phillips tabata riba caya, y tabata traha mas cu e 40 oranan necesario, y tabatin contacto cu ne constantemente, pues e por sigura cu Phillips tabata trahando y no tabata un ambtenaar spirito. Huez no a confia e cos y a sigui insisti na Phillips, pa e sa di dje mes, kico specifico e tabata haci tur dia, con e tabata hacie, y con e tabata registra su resultado di trabou. Y a cuestiona cu no tabatin nada documenta, riba papel y cu e no tabata raporta papel na Oduber. Aki Phillips a splica huez, cu e la dicidi pa haci esaki, pasobra den pasado, e tabata raporta su trabou y cu politica tabata hunga papel sushi, hortando su ideanan y broma despues cu nan. “Nan tabata pronkia cu pluma di otro” Phillips a sigui bisa huez. Y como tal, e la splica huez, e la opta pa manda whatsapp di su trabou,papia di esaki durante conferencianan di prensa y riba Facebook. Mester bisa cu Oduber a reclama na huez cu con por ta posibel cu den 7000 pagina di interogacion, ta solamente un persona ta menciona e caso aki, cu ta actual parlamentario Marisol Lopez, cu a haci e denuncia riba e tema. Pero cu ningun otro caminda no ta aparece e asunto aki ni e nomber di e 'ambtenaarnan spirito'.