Canwood: Mester declara e 3 reporteronan liber di sospechoso di soborno di un ambtenaar

ORANJESTAD – Corte mester declara e tres sospechosonan Nelson Andrade, Norben Giel y Brian Koolman liber. Asina e abogado Defensor Doris Canwood a bisa huez diabierna atardi como parti di e defensa di su clientenan. Su clientenan ta wordo acusa di a soborna un ambtenaar activamente, viola secrecia y ta miembro di un organisacion criminal. E motibo di defensa pa libertad segun e abogado, ta cu e ambtenaar encuestion Vos, no ta papia berdad. 

SOSPECHOSONAN

Segun Canwood, cliente Giel ta sigura cu e no a paga Vos pa informacion di polis. Pa loke ta Andrade, aki tambe segun e abogado, Vos a papia mentira. Ademas e acusacion cu ta Andrade a financia e ekiponan, no ta cuadra segun e abogado. Esaki pasobra cada persona a percura pa e aparatonan y ta Vos mes a instala tur cos. Tambe Andrade ta nenga di a ofrece Vos placa. Andrade ta bisa di a haci donacion na hende den necesidad manera e ta custumbra di haci. Pa acus’e di a cumpra Vos door di a treat e cerbes, Andrade ta considera como algo baho di Vos. 

LIBER DI SOBORNOTambe abogado Canwood ta haya cu mester declara Giel liber di soborno, pasobra e no a paga pa e servicio. Ademas no ta haya cu a viola secrecia di polis, pasobra ta Vos mes a ofrece cierto medio pa scucha. No ta pasobra Vos a viola e secrecia, cu mester castiga e periodistanan tambe. Segun e abogado, periodistanan tin libertad di publica noticia. Y ta nan deber pa publica cos cu nan ta haya ta malo. Tambe ta bisa cu si ta strobe prensa di haya informacion, ta stroba e libertad di prensa. 

PERSIGUI PRENSA

A mustra tambe cu envez di reuni cu prensa riba nan trabou, e ta persigui nan den corte. A referi na e hecho cu hasta polis ta yama prensa pa yuda haya cierto informacion. Y finalmente, no ta pasobra Vos a viola e secrecia di informacion, no ta haci prensa culpable. Y ta haya cu Vos mester carga tur e culpa, y no nan. 

ORGANISACION CRIMINAL

Pa lke ta e organisacion criminal, e reporteronan no ta haya cu nan ta forma parti di un organisacion asina. Un cooperacion incidental no ta haci nan un organisacion criminal. Y como tal, nan ta haya cu OM mester ta hopi cauteloso cu e declaracionan haci contra prensa. Y no ta na OM pa determina con prensa tin cu haci su trabou. 

STROBA ESTUDIO NA HULANDA

Pa loke ta e castigo exigi pa Koolman, esaki por strobe su enseñansa na Hulanda actualmente, unda cu e ta studiando. Giel por haya un castigo condicional y trabou pa comunidad. Y pa loke ta e exigencia di castigo di prizon pa Andrade, ta haci como si fuera e ta un criminal. A sigui pa seriamente cuestiona e exigencia di OM, y a pidi huez pa no honra e peticion, pasobra nan a haci uso di nan derecho diu libertad di prensa. Huez a suspende e caso y ta dicta sentencia dia 18 di December pa cuarto pasa di 8.