Encuesta di KvK: Partido MEP ta e ‘ganador’ di debate di KVK

ORANJESTAD – E partid MEP a gana e debate di Camara di Comercio diahuebs anochi cu 46% di televidentenan cu a participa na e encuesta di Camara di Comercio riba e debate. E partido cu a sigui ta FUTURO y PPA, cu un margen mas abou si, na 17 y 15% respectivamente. E encuesta conduci pa e gremio durante curso di anochi, a duna e televidente e posibilidad pa despues di cada tanda, laga sa kico e ta pensa di e presentacion di e lidernan di e partidonan respectivo.   E dos partidonan cu menos a luci segun e televidentenan, tabata CURPA y HTC. Mei mei a keda RAIZ, ACCION21, MAS y partido RED. Partido AVP no tabata presente debi na un desacuerdo. 

E DESENLANCE GENERAL

E debate tabatin 3 tanda durante cual a presenta varios ponencia riba cual e participantenan mester a presenta nan punto di bista riba e ponencianan aki. E parti mas interesante tabata e tanda unda cu e lidernan por a haci otro pregunta, y keda atende otro riba esaki. Algun pregunta tabata mas skerpi cu otro, pero sigur esey ta e tanda cu sigur a resalta y tabata esun mas faborito. \

PRESENTACION DI LIDERNAN

Manera ta e punto semper den un debate, e forma con e lider ta profila su mes, mas cu e contenido ta resalta. Esaki debi cu den un debate cu 10 lider, ta dificil pa saca mucho cos concreto den apenas 2 pa 3 minuut den contesta cu por duna segun e formatonan di un debate. Ta solamente ora cu tin dos pa tres candidato, un debate por bira manera cu e pueblo ta angela, un intercambio cayente di informacion y pensamento y e bay bin entre candidatonan. Manera ta custumber, experiencia a hunga un rol importante y e abilidad di papia den publico. Esnan cu a resalta tabata esnan experencia, y esnan cu tabata ‘nobo’, cu excepcion di dos of tres, tabata notablemente mas suak cu nan presentacion. 

E PRESENTACION TECHNICO

E presentacion riba su mes di camara di comercio tabata mustra professional, bon presenta pa e maestro di ceremonia y technicamente bon hinca den otro. Camara di Comercio por mira atras riba un anochi basta exitoso pa loke ta e resultado.