KVK ta lamenta cu AVP a dicidi pa no participa den debate politico

ORANJESTAD – Camara di Comercio ta lamenta e decision di partido berde AVP pa no presenta na e debate politico di diahuebs anochi. Asina e presidente Diederik Kemmerling a informa Noticiacla diahuebs mainta. Segun Kemmerling, KVK pa añanan largo a tene un debate politico prome cu eleccion parlamentario, y e aña aki esey no tabata diferente. Y esaki semper tabata entre e lidernan politico. Pero partido AVP tabata insisti pa manda nan candidato # 1, Wendrick Cicilia como su representante, cu ta algo cu KVK no por a acepta pasobra e ta bay contra e reglanan. “Tin regla y mester tene bo mes na dje’, Kemmerling a bisa. E debate ta cuminsa awe nochi 7'or y ta wordo transmiti pa e.o. Telearuba y e youtube di Camara di Comercio. 

E SITUACION

Segun Kemmerling, ora cu AVP a informa KVK di nan ‘dilema’, e gremio comercial a informa e partido cu segun nan regla, e lider ta rekeri pa dos di e tres tandanan di e debate, esta e tanda #1 y # 3. Y den e tanda # 2, KVK lo no tin problema pa Wendrick Cicilia presenta como e representante. Esaki pasobra esey ta e tanda unda cu cada partido por presenta un otro candidato tambe como e representante. Pero no den e tanda 1 y 3. Y asina, segun Kemmerling, ambos banda ta keda satisfecho, esta cu AVP ta cumpli cu e regla di tin e lider den e tanda 1 y 3, y e otro candidato den tanda 2. Pero AVP a rechasa esaki pasobra e tabata kier Wendrick Cicilia den tur tres tanda y esaki no tabata por segn KVK.  

SORPRESA

Pa su sorpresa, Kemmerling a tuma nota den prensa, (24ora.com:red) cu AVP a dicidi contra e ‘plan’ aki y a cancela nan participacion completo. “Nos ta lamenta esaki, y ta considera esaki un oportunidad perdi pa e partido. Nan ta keda invita pa ta presente, pero cu e lider” Kemmerling a sigui bisa. Pues, ta mustra cu awe nochi, e debate lo tin 10 partido, envez di 11.