Na Corsou, Godett ta remplasa Martines como miembro di parlamento KEM

WILLEMSTAD - Parlamentario pa partido KEM, Michelangelo ‘Low’ Martines a firma un karta di retiro temporal komo miembro di parlamento. Esaki tabata posibel despues ku djamars 12 novèmber a saka Martines for di “beperking” (limitashon). Djárason 13 novèmber Martines mester a presentá atrobe dilanti wes komisario pa evaluá si ta prolongá su detenshon.

Direktiva di partido KEM a reuní djamars anochi mes riba e desishon di Martines pa entregá su retiro. E proseso ku lo sigui ta enserá ku ta entregá e karta di retiro na presidente di parlamento ku na su turno lo informá Konseho Supremo Elektoral. Den seno di direktiva di KEM a deliberá, den un reunion ku a tuma lugá djamars anochi 12 novèmber, riba ken ta bai drenta Parlamento pa KEM na lugá di Martines.

Godett ku ta aktual kolaboradó di frakshon. A disidí ku lo sigui ku e sekuensia normal di lista loke ta enserá ku number 2 riba lista di kandidato pa elekshon na 2021, Anthony Godett lo bira parlamentario pa KEM miéntras ku Martines ta pone tur su konsentrashon riba su kaso. Martines ta detené riba sospecho di trafikashon di droga i labamentu di plaka.

Den kaso ku Martines rekobrá su libertat promé ku elekshon e lo ta bèk den parlamento pa KEM. Sinembargo pa aworakí ta pendiente pues kon lihé Konseho Supremo Elektoral lo por traha riba kredensialnan di Godett pa manda esakinan parlamento. Den un reunion públiko, parlamento lo verifiká e kredensialnan pa despues Godett por hura dilanti gobernadó.

Ku esaki e proseso pa hura ministernan nobo tambe por kontinuá. Kandidatonan pa minister ta Jason Fullinck (KEM) i Raymond Jamanika pa miembro independiente di parlamento, Zita Jesus-Leito. Godett ta sinembargo e kandidato di partido KEM ku mas eksperensia den polítika. E tabata miembro di di Konseho Insular, diputado i parlamentario pa partido Frente Obrero Liberashon 30 di mei.

Ampliashon

Relashoná ku intentonan pa alabes amplia e base di koalishon di gabinete Pisas manera EXTRA a informá ta asina ku e reunion aki no a tuma lugá mas. MFK huntu ku sigur un (1) otro frakshon representá den parlamento tabatin palabrashon pa a reuní djamars 12 novèmber den oranan di tra’i mèrdia, pero pa motibunan deskonosí a kanselá e reunion. Ampliashon di e koalishon tabata den kuadro di e posibilidat ku Martines lo keda den “beperking” loke lo a difikultá e proseso KEM apuntá un otro parlamentario ku na su turno lo a difikultá pa e kandidatonan pa bira minister di Desaroyo Ekonómiko i Desaroyo Sosial, Labor i Bienestar por hura.

E detenshon di Martines tabata motibu pa un karisia den gobernashon. E koalishon aktual ku ta konsistí di partidonan MFK, KEM i miembro independiente di parlamento, Zita Jesus-Leito tin u mayoria mínimo di 11 asiento den parlamento ku ta konta ku 21 asiento total. E echo ku Martines ta detené i no por ta presente den reunionnan ta nifiká ku gobièrnu no tin un mayoria presente den reunionnan di parlamento.

Den dianan tras di lomba a tene tambe kuenta ku 3 diferente senario pa atendé ku e situashon aki. Unu tabata ku Martines ta entregá su retiro i un otro kandidato di partido KEM ta drenta parlamento, na di dos lugá e eksplorá e posibilidat pa amplia e base di koalishon manera ariba menshoná i e di tres i último opshon lo tabata pa pidi gobernadó disolvé parlamento i yama elekshon nobo. NOTA: Texto scirbi den Papiamento fonetico di Corsou.