Na Corsou, MFK ta trahando riba ampliacion di coalicion prome cu yama eleccion nobo

WILLEMSTAD- Banda ku ta pendiente kiko ta bai pasa e siman aki ku detenshon di Martines e opshon di ampliashon di e koalishon ta algu ku prinsipalmente MFK ta eksplorando. Disolvé parlamento i yama elekshon mas tempran no tin preferensia di e partidonan ku ta den koalishon na e momentonan aki. Esaki EXTRA por a komprondé for di kòmbersashon ku prominentenan den seno di e koalishon di MFK, KEM i parlamentario independiente, Zita Jesus-Leito.

E klaridat riba futuro di gabinete Pisas II ku lider polítiko di MFK, Gilmar ‘Pik’ Pisas i Jesus-Leito a bisa ku mester a bini pa mas tardá djaluna 11 novèmber no a bini mas. KEM ta wardando ketu bai kiko ta bai pasa den e investigashon kontra lider di partido KEM, Michelangelo ‘Lo’ Martines. Abogado di Martines, Eldon Sulvaran, entretantu a entregá un petishon na korte pa suspenshon di su detenshon.

Tratamentu di e petishon aki den korte mester a tuma lugá djamars 12 novèmber parti mainta. KEM a tene un reunion djaluna atardi, despues ku mainta no a logra haña e miembronan di direktiva pa bini huntu. Nada nobo no a sali for di e reunion aki.

Ta pendiente prolongashon òf suspenshon di detenshon di Martines i un desishon di parti Martines si e ta dispuesto pa entregá su retiro komo miembro di parlamento pa asina un otro miembro riba lista di KEM drenta parlamento. Pisas sinembargo a indiká siman pasá ku Martines lo mester tuma retiro tambe komo lider polítiko di KEM.

Den kurso di djamars MFK a keda di pone tantu KEM komo Jesus-Leito na haltura di su posishon despues di tambe a reuní djaluna anochi den su seno. Den e reunion aki a bin dilanti ku no por karga largu mas ku e situashon rondó di Martines, pero ku ta duna espasio ainda pa KEM solushoná esaki ku nombramentu di un remplasante pa Martines den parlamento.

Kolaboradó di frakshon di KEM, Anthony Godett ta bisa ku ta komprendibel ku MFK i Jesus-Leito ke klaridat, pero ku KEM tambe ta en espera ainda kiko ta bai pasa ku e investigashon penal mas aleu kontra Martines. Pa e partido ta importante ku Martines ta logra rekobrá su libertat mas lihé posibel.

AMPLIASHON

Ampliashon di e koalishon, banda di no ke pa elekshon aworakí, ta un antisipashon riba e posibilidat ku Martines ta keda den aresto preventivo pendiente investigashon mas aleu den su kaso. Mirando ku Martines ta alabes den restrikshon (“beperking”) i no por tin kontakto di niun forma ku otro persona,  e proseso pa e tuma retiro komo parlamentario por dura largu.

Mas partido polítiko tambe a tende di e plannan aki i na inisio di reunion di Komishon Sentral di Parlamento djaluna lider di frakshon di partido MAN, Giselle Mc William a puntra presidente di parlamento Charetti America-Francisca ta kon ta bai atendé ku situashon den parlamento aktual, kaminda tin un gobièrnu ku no tin sosten total den koalishon.

Riba e pregunta aki America-Francisca a bisa ku niun karta a drenta na parlamento indikando ku gabinete Pisas II no tin sosten di un mayoria den parlamento mas. NOTA: Texto ta scirbi den Papiamento fonetico di Corsou.