Cuater periodista ta dilanti huez diabierna, pa e.o. soborno contra ambtenaar

ORANJESTAD – Diabierna awor cuater periodista local mester presenta dilanti mesa berde como sospechoso di un caso cu ta trata e.o. soborno di agente policial y participa na un organisacion cu intencion pa comete crimen y/of soborno di un ambtenaar (polis). Esaki lo a sosode entre 2021 y 2023. E caso cu a cuminsa tur esaki, a tuma lugar na 2023 ora cu e awor ex agente policial Vos a keda acusa y sentencia pa su participacion. E caso di diabierna ta mas bien un ‘continuacion’, pero e biaha aki enfocando riba e periodistanan. Ta trata di e periodistanan Richard L, Nelson A, Brian K, y Norben G. 

E CARGONAN

E cargonan ta e.o. cu durante e periodo di 1 Januari 2021 te 22 di Maart 2023, conhuntamente, a ofrece un ambtenaar den funcion di Cuerpo Policial di Aruba regalo of promesa cu e meta pa hib’e na haci of keda sin haci algo contra deber di su trabao. Nan ta wordo acusa di, den e periodo menciona, conhuntamente, a intencionalmente viola secretonan di cual e tabata sa cu e ambtenaar, relaciona cu su funcion, tabata obliga pa tene. (*)          Nan ta wordo acusa di, entre 1 Januari 2021 te 22 Maart 2023, a participa na un organizacion cu tabata consisti di un y/of mas otro persona cu tabatin como meta pa comete crimennan, esta, corupcion di un ambtenaar y/of tuma y/of duna soborno y/of maluso di funcion y/of violacion di secreto di trabao.

SUSPENDE E CASO

Tabata na juni ultimo cu riba peticion di abogado Canwood, a pospone e caso inicial, y a haya e fecha di diabierna awor 15 di November, y tambe 18 di November. Diabierna e caso ta poni pa cuminsa 8:30am, y dialuna 18 pa 1:30pm. 

CASO VOS

E agente Vos a keda condena na December 2023 ora cu huez a hay’e   culpabel y condene na 16 luna di prison, di cual 8 luna ta condicional cu un tempo di prueba di 3 aña. Hues a bisa cu e ta prohibi Vos di traha como Polis pa un periodo di 3 aña. E decision aki a haci cu dia 9 December 2023 atardi mes Vos a haya su libertad.

APELA SENTENCIA

Ministerio Publico no tabata di acuerdo cu e sentencia y a apela esaki.Mientrastanto a sigui cu e parti specifico di e periodistanan. Tabata durante e fecha ey na December, cu Fiscal a bisa cu a cuminsa un investigacion riba e motibo cu cierto periodista tabata aparece tur caminda di suseso promer cu e propio polis. Segun Ministerio Publico, tabata sospecha cu cierto periodista lo tabata scucha radio di Polis. Fiscal a bisa cu tabatin casonan penal den Corte caminda a castiga e agentenan y a kere cu esaki a stop e cierto media cu a haya castigo combina. Sinembargo no ta asina. El a bisa cu dia 16 Maart 2023, Cuerpo Policial a haci denuncia di ladronicia di Tetra-radionan. Lo a constata cu tabatin 3 radio na un localidad y cu nan tabata cendi.  

DOS FECHA

Manera cu Noticiacla a bisa anteriormente caba,  corte di Husticia a planea 2 dia pa tratamento di e caso aki. Dia 15 y 18 di November 2024. Dia 15 di November lo por spera exigencia di Fiscal y posiblemente defensa di abogado. A pone un dia extra como reserva, esta 18 November 2024, Despues Hues lo bisa si e lo dicta sentencia di biaha of si e lo fiha un fecha pa asina e studia e caso y despues dicta sentencia.