Na Corsou, parlamentario deteni mester entregá asiento pa e partido por sigui den coalicion

WILLEMSTAD - Awe MFK lo informá di su posishon pa ku e situashon ku a surgi aktualmente den gobièrnu, kaminda un di e  partnernan di koalishon a keda detené. Esaki ta loke EXTRA a komprondé ayera nochi, despues di e reunion urgente ku tabatin na sede di MFK.

Ayera nochi MFK a reuní den nan seno i nan a yega na nan posishon. Sinembargo promé minister ku ta lider di MFK a apstené di duna detaye di nan posishon.

Den entrevista ku EXTRA sr. Pisas a informá ku komo partido nan a bin huntu mirando e situashon polítiko awor aki, ku detenshon di Martines. Nan a bin huntu i interkambiá pa asina tin direkshon pa bai.

E kombersashon segun sr. Pisas a bai bon i el a haña tarea pa hasi. Pa awe lo saka e informashon di e tarea aki aki i lo informá tur hende pareu i despues lo sigui elaborá di e pasonan di MFK.

Pa awe lo informá pa tur hende por sa di dje. Lo komuniká esaki awe pasobra mester papia ku e otro miembronan di koalishon promé segun sr. Pisas.

Pa loke ta e dos personanan ku tin komo posibel minister sr. Pisas a bisa ku e proseso ta hopi leu pero a wanta kuné. I despues lo informá kon ta bai sigui. No sa ainda kon ta bai sigui miéntras no kaba ku e otro problemátika. Awe MFK lo duna klaridat riba nan posishon.

EXTRA mas aleu a komprondé den pasionan ku e screening di e kandidatonan pa minister ta kla i lo ta asta serka gobernador kaba.

Pero tambe EXTRA a komprondé ku miembresia di MFK a duna direktiva mandato bon kla. Na promé lugá nan a duna mandato pa MFK sigui ku gobernashon. Pero na di dos lugá nan a laga direktiva komprendé ku no ta traha ku Lo Martines di e forma aki, esta detené pero ku e tin di entregá asiento pa KEM por sigui den koalishon. Den e kaso aki si e entrega asiento, Anthony Godett lo por bira parlamentario.

Pero parse ku direktiva di MFK ta pendiente di e desishon di KEM mes i tambe ta warda e 8 dia di detenshon di Lo Martines pasa, pa mira si e ta keda prolongá. Pa djaweps awor lo mester tin desishon riba prolongashon di Lo Martines. NOTA: Texto ta scirbi den Papiamento fonetico di Corsou.