Analisis:.. Shock therapy cu trahamento di lista politico

Skirbi pa Tito Lacle, publicista Noticiacla.com

Den pleno campaña y cu tur partido haciendo nan esfuerzo pa yena nan lista - loke no a resulta algo facil  - e dos partidonan grandi a haya nan mes confronta cu pelea interno pa number. Na final a bira conoci cu un pelea tabata mas grandi cu e otro. Lider di e partido geel, Evelyn Wever Croes a scoge pa e caminda di menos resistencia y a tene tur cos ‘casi’ manera e tabata; e top 10 no a conoce niun cara nobo. E unico cambio ‘grandi’ tabata pa hala Dangui Oduber di # 3 pa # 2 y manda Xiomara Maduro pa # 3, siguiendo e secuencia di cantidad di voto di eleccion pasa. E otronan a schuif un puesto ariba, debi na e desaparicion diripiente di Glenbert Croes di e lista (debi na su situacion legal). Pa hopi tabata remarcable cu Endy Croes - cu a wordo baha recientemente pa un mayoria den oposicion den Parlamento debi na e responsabilidad cu e ta carga pa organisacion SSA caminda tin caso di fraude - a aparece riba un number hopi prominente. Esaki ta claramente un indicacion cu  den e partido a haya cu e mocion den Parlamento tabata prematuro debi cu e investigacion ta andando ainda. Tempo lo indica si tabata oportuno. 

Mientrastanto, den e partido berde Mike Eman a opta pa uza "shock therapy" cu su lista. E anochi prome ainda cu entrega di lista, a tarda pa presenta e lista na publico. Despues di un tardansa basta largo, Eman a sali pa anuncia cu a ‘logra’ mengua tur problema y a keda cla cu e lista finalmente. Cambiando su candidato hoben estelar di nr. 2 pa nr. 6, el a mustra di a complace esnan ‘bieu’. Esey sinembargo no a dura largo ora cu el a "bolter" e cuenta haciendo su candidato hoben, Wendrick Cecilia, e nr.1 riba lista (como lijsttrekker) y su mes a bay na nr. 29 (como lijstduwer). Porcierto, lijsttrekker no mester wordo confundi cu lider di partido pasobra esey ta wordo dicidi durante congreso di partido. Pero pa Aruba esaki ta algo nobo. Y e problema di e partido berde awor, ta pa splica e pueblo con esaki ta funciona. Pasobra pa e persona comun, no tin diferencia entre e lider y e number 1 di partido. Y tin varios cu ta bisa cu un no ta e otro, toch mes no por splica e diferencia convincentemente, y si bo no por convence e ciudadano, e asunto ta bin persigui bo despues. Tin un dicho ta bisa: Hacha ta kap sin corda riba neishi den palo (ora bo ta haci cos awe, sin pensa riba e consecuencia mañan).  Y si esaki no cana bon, e por crea un otro problema interno pa Mike, den sentido cu ‘a tuma hende haci’, hasta den su propio partido. Riba su mes Mike lo mester a pensa den su frustracion pa renoba e partido cu e mester a haci e move aki. E ta parse un tiki impulsivo, y tambe un acto di deseperacion. Ademas, tin e pensamento di cu si bo no por maneha un situacion den bo partido, of tene bo partido hunto, con bo kier pidi pueblo pa duna bo e mandato pa maneha e pais. Pero dia 6 di December nos lo wak si e terapia aki tabata un bon paso. Tambe kizas e ta un les scondi pa esunnan cu tabata pleita pa bon number cu eigenlijk bringando pa un number abou riba lista ta nada mas cu trata di haya un lift riba custia di un otro pa drenta Staten. Pasobra wak bon kendenan den e fraccionnan mas grandi ta eyden cu "voorkeursstemmen" . Ya cu bo mes no por saca bo mes, pleita cu alma y curpa pa un bon number riba lista. E pensamento ideal di candidatonan mester ta "no lucha pa number, sino traha pa voto". Pa loke ta e partido berde, e lider Mike tin un reto special awor pa splica cada bes na su constituyentenan cu e ta e lider di partido keto bay. Mester conclui si, cu e "entertainment value" di e campañanan aki den e eleccion aki ta uno basta halto. Manera nan ta bisa “Never a dull moment in Aruban politics’.