Seis partido ta sigui busca firma di sosten pa participa den eleccion 2024

ORANJESTAD – Despues cu e prome dos (di ocho) partido politico dialuna a logra sigura nan participacion pa e proximo eleccion di dia 6 di December 2024, ta keda e 6 partidonan otro cu tambe tin cu logra e meta di 586 firma. Entre nan, esunnan cu ta mustra cu por ta e siguiente pa logra, ta partidonan RED y LPR. LPR a cera e anochi cu 171 firma, mientras cu RED a logra cera cu 150 firma. Y ta premira cu den curso di sea awe of mayan, e dos partidonan aki tambe por keda cla. E dos partidonan cu ta mustra ‘suak’ ainda, ta e partido MIA y UPP, cu 13 y 10 firma cada uno. Si tene cuenta cu ambos partido no tin mas cu 10 candidato ambos, por mira cu e sosten ta realmente abou. E otro dos partidonan cu tambe falta firma ta CURPA y HTC. CURPA na cierre tabatin 126 firma, y HTC 34. 

AYUDO DI PARTIDONAN GRANDI

A raporta tambe cu ta custumber, tradicion, cu otro partidonan ta ‘yuda’ esnan chikito, pa haya firma. No pasobra nan ta amigo di otro of kier nan ‘bon’, sino mas bien pasobra mas partido participa, mas chens tin pa tin restzetels cu ta bay finalmente pa esnan grandi. E biaha aki tabatin varios ‘voice note’ y app, ta bay rond, cu ta specificamente pidi pa ‘sostene’ un of otro partido. Den caso di un di nan, por tende claramente con e politico ta pidi pa firma pa un partido specifico, pero ta pidi den mesun rosea tambe pa ora di eleccion si, pa vota pa e mes, riba su number. Pues esey ta confirma cu ta djis, ‘yuda’, pero ora di vota, mester vota pa otro. Noticiacla durante curso di dia, lo actualisa e bista di firmamento. Te cu awor, cada tres ora, Conseho Electoral ta actualisa e bista cu tin.