Wever-Croes: Endy Croes definitivamente lo ta riba lista di MEP como candidato!

ORANJESTAD – MEP ta garantisa cu ex minister Endy Croes lo aparece riba e lista di candidato diabierna ora cu e keda entrega. Asina e lider di partido Evelyn Wever-Croes a sigura durante un reunion di partido diaranson anochi. E partido a yama un reunion urgente diaranson anochi pa atende cu e situacion cu a surgi despues cu e mesun marduga, un mayoria den Parlamento a aproba un mocion di desconfiansa contra e awor ex mandatario. A surgi e pregunta cu si, mescos cu e caso cu ex minister Glenbert Croes cu a retira siman pasa y no por ta riba lista debi na su status di sospechoso den un caso, cu Endy Croes tampoco lo ta riba e lista politico. Pero, e lider politico a kita tur duda, y a bisa cu ‘definitivamente’ Endy Croes lo figura riba e lista y a sigura cu Endy Croes no a haci nada malo, pa cual e lo mester keda for di e lista.