Leonardo Figaroa ta participa toch na eleccion 2024, pero como miembro di otro partido nobo

ORANJESTAD – Despues cu dos siman y mei pasa, e la anuncia cu e no ta participa na e eleccion parlamentario na December awor cu su mesun partido, e la confirma dialuna mainta cu e ta participa toch, como miembro di otro partido nobo. Ora cu a puntre pakico diripiente si, y cu cua partido, e la bisa solamente cu mester warda diabierna. ‘Esey ta e afspraak cu e partido nobo cu mi a join’, e la bisa noticiacla dialuna mainta. “Mi lo saca un statement oficial dicon mi a dicidi di join un partido nobo” e la sigui bisa. Riba insistencia di e portal aki, e la bisa finalmente “Pasobra mi tin cu respeta e afspraak cu e partijbestuur” e politico hoben a bisa. 

NO TA PARTICIPA MAS

Tabata dia 26 di September ultimo cu Figaroa a anuncia publicamente cu e no ta participa mas na e eleccion parlamentario di dia 6 di December. E tabata un di e cuater partidonan nobo poni pa participa den e eleccion parlamentario 2024. Pero, Partido Direccion Politiea cu su lider Leonardo Figaroa e fecha ey a retira su partipacion. “ Mi ta desea di informa pueblo cu mi persona, y Partido Direccion Politiea a manda informa Conseho Electoral di Aruba mediante un carta cu nos lo no ta participando na e eleccion benidero di 6 december 2024” e la bisa na e occasion ey.

MOTIBO 

Mirando e hecho cu e periode di eleccion ta asina serca, organisatoriamente y financieramente e ta presenta retonan cu aworakinan como organisacion no ta alcansabel mas pa por presenta un organisacion solido cu por brinda e confiansa na e electorado pa ta un opcion real pa e grupo cu ta determina pa vota pa algo diferente. Esey segun Figaroa, ta su motibo principal pa no participa. " Personalmente, e decision aki ta kibra mi curason, pero tin ora como un lider bo tin cu accepta cu e circumstancianan no ta faboral y esey ta pone cu bo tin cu haci un reflexion profundo riba ki impacto bo decision lo tin pa Aruba. Mi compromiso cu hobennan, studiantenan, muchanan y pueblo di Aruba no a termina” e ta sigui bisa. Paworkinan e lo a enfoka completamente riba su estudio, unda cu desde 18 di september e por yama su mes un hurista cu su titulo di LL.B. Su rol den politicamientrastanto lo ta uno diferente, pero e sa cu e compromiso pa empoderacion lo continua. Kico a pone cu awor e la dicidi di participa toch, ta keda un ‘misterio’ te cu diabierna of te ora cu e anuncia su motibo.