Rastro di destruccion na Florida dor di horcan Milton, cuater morto dor di tornado

MIAMI - Horcan Milton a laga un rastro di destruccion den e estado Mericano di Florida. Por lo menos cuater morto a wordo causa pa tornadonan y den hopi comunidad servicionan di emergencia ta bezig ta atende cu e molester causa pa bientunan fuerte, olanan di tormenta y awasero persistente.

E cuater mortonan a tuma luga den e comunidad di St. Lucie den oost di Florida. Mas tempran tabatin informe cu un tornado a destrui un compleho di cuido residencial pa grandinan aki, cu tabata situa den casnan mobil.

Tin tiki bista riba con extenso e daño causa pa Milton ta. Segun autoridadnan na Florida, un imagen cla di e impacto di Milton lo surgi solamente den lus di dia. Casi tres miyon cas i negoshi ainda ta sin coriente.

E horcan a yega tera alrededor di 9:30 p.m. ora di Aruba na Siesta Key, djis sùid di e stad di Tampa den west di Florida. Milton e tempo ei tabata un horcan di categoria tres, cu biento di te cu 200 kilometer pa ora.

DAÑO

Biento fuerte a causa cu varios grua di construccion na Tampa a basha den otro. Den St. Petersburg den cercania, e dak di e stadion di beisbol Tampa Bay Rays a keda severamente daña pa biento fuerte.

Mas di ocho ora despues, Milton a bandona e estado banda di Cabo Canaveral, den e parti oriental di e estado, unda e famoso sitio di lansamento di mision espacial ta situa.