Ta acusa Glenbert Croes di soborno y abuso di su funcion como minister

ORANJESTAD – Ex-minister Glenbert Croes ta wordo sospecha di soborno y abuso di su funcion como minister den asunto di permiso pa loke ta e caso Portulaca. Esaki a keda confirma pa un di su abogadonan mr Demis Illis diamars atardi laat na Noticiacla. E awor ex-mandatario mientrastanto a keda transporta den boei, pa un cel di warda di polis, despues di a termina su prome dia di interogacion na edificio di Landsrecherche riba Boulevard. 

IN VERZEKERING

Pa ley, despues di a keda interoga e prome dia, (oranan), a pone e ex mandatario ‘in verzekering’, osea encarcela e ex mandatario pa tres dia largo. Esaki ta pasobra no a termina cu e proceso di interogacion ainda. Mientrastanto e por tin contacto solamente cu su abogadonan. Pa ley, por detene tres dia mas, y despues un huez comisario ta determina si ta necesario pa prolonga e detencion pa 8 dia mas. Si surpasa esaki dos biaha, ta transporte e ora pa KIA, unda cu e por keda deteni pa un tempo maximo di 60 dia. Pero si entre awor y esey, keda cla cu e interogacion, ta laga e ex mandatario den libertad condicional te ora cu su caso bin dilanti. Te cu e momento ey, e ta keda un sospechoso, te ora cu su caso bin dilanti of cu ministerio publico dicidi di seponeer e caso.