OM ta confirma: Minister Glenbert Croes ta deteni pa caso Portulaca

ORANJESTAD – Ministerio Publico diamars mainta laat a confirma cu enberdad awe mainta 8 di oktober 2024 a detene e minister di Labor, Energia y Integracion Glenbert Croes. Despues a tuma lugar un listramento (“doorzoeking”) den su cas.  

MOTIBO DI DETENCION

E detencion ta den cuadro di e investigacion Portulaca. Esaki ta un investigacion cu ta andando algun  tempo caba di Landsrecherche bao di guia di Ministerio Publico. E investigacion aki ta entre otro dirigi riba e sospecho di delitonan encuanto dunamento di permisonan di estadia/trabou entre 2020 te cu awor. 

CASO PORTULACA

Anteriormente, dia 4 di juni 2024 den e mesun investigacion Portulaca, detencionan tambe a tuma lugar caba. E tempo ey tambe listramento den diferente cas y edificionan commercial a sosode y confiscacion di  obhetonan a tuma lugar. Di e investigacion hasi despues na e obhetonan confisca, e sospecha contra e Minister a surgi.  

RESTRICCION DEN INTERES DI INVESTIGACION

Ministerio Publico a aplica riba e sospechoso restriccionnan den interes di e investigacion. Esaki kier meen cu e sospechoso por tin contacto solamente cu su abogado y no cu otro hende. Entre otro pa e motibo aki Ministerio Publico ta cauteloso cu dunamento di mas informacion encuanto e contenido di e caso aki.