Ekipo nacional di Robotica lo representa Aruba na competencia na Grecia

ORANJESTAD - The STEM Embassy a crea e equipo nacional di Robotica cu lo representa Aruba na e competencia Internacional di Robotica yama FIRST Global Challenge cu ta tuma lugar na Grecia dia 26 te cu 29 di september 2024. 

E equipo cu ta yama FIRST Global Team Aruba ta consisti di hobennan Princess Tucker (17), Ruarth Lampe (15), Quintin Lochtenberg (15), Angeline Lacle (16), Guiyan de Nobrega (17). E hobennan a conoce otro na un Hackathon Robotics Challenge organisa door di The STEM Embassy. Jean-Pierre Solognier, Technical Coach, LeAnn Tromp y Michelle Mendez Fonseca miembronan di The STEM Embassy lo coach e hobennan durante e competencia. Esaki ta di dos biaha cu Aruba ta competi na e FIRST Global Challenge. Aña pasa ela tuma lugar na Singapore unda Aruba a competi pa prome biaha. 

E team di Aruba a biaha bai Grecia dialuna 23 di september. Diaranson 25 di september tabata e prome dia di e evento unda nan a pasa e inspeccion di e robot. Mañan e competencia ta sigui, por follow esaki riba livestream: https://first.global/live/ 

FIRST Global ta un organisacion cu un mision simpel; promove Ciencia y Technologia entre hoben. Nan ta hasi esaki posibel organisando “The FIRST Global Challenge” unda mas cu 191 pais lo competi na un competencia olympico di robotica. Unda e hobennan mester diseña y programa nan mesun robot. 

Mescos cu The STEM Embassy nan mision ta pa inspira e hubentud pa explora e ramonan di STEM (Ciencia, Technologia, Ingenieria y Matematica). The STEM Embassy ta un organisacion consisti di studiante y jong proffesionals di Aruba y Corsou cu ta situa na Hulanda y Merca cu kier lanta curiosidad y confianza den STEM riba tur e islanan ABC. 

Por sigui e competencia di robotica riba Instagram @firstglobalaruba, @f1rstglobal y @TheSTEMEmbassy.