Trafico Sigur: Sea un Peaton responsabel y uza zebrapad

Trafico Sigur: Sea un Peaton responsabel y uza zebrapad

Posted on 09/30/2024 7:22 am AST | Updated on 09/30/2024 7:23 am AST

ORANJESTAD  - Comision Trafico Sigur a informa e comunidad riba varios topico nan importante di trafico na Aruba. Sra. Liliana Rasmijn Vocero Interino di Korps Politie Aruba (KPA) a elabora riba un di e topico nan cu siguramente ta interesante y alavez importante pa cu e responsabilidad di e Peaton y automobilista nan den trafico y e uzo di zebrapad pa asina nos como comunidad por mantene nos mes sigur riba caminda. 

PEATON

Vocero policial interino Sra. Liliana Rasmijn a describi cu “Un Peaton ta forma parti di trafico na e momento cu e ta cana riba caminda.” Pa es motibo aki ta importante pa tene cuenta unda ta mas sigur pa por cana y crusa paso ley tambe ta aplicabel pa e peaton.

Sra. Liliana a añadi cu un peaton tin preferencia solamente na unda tin borchi di un zebrapad pa por crusa y a recomenda tur peaton para un rato y pensa con mi por crusa caminda e manera mas sigur?  "Manera nos a siña na basis school; wak links, rechts y bolbe wak links prome cu crusa. Cana rechtdoor enbes di schuin y riba un bon tempo, corda bo tambe como Peaton ta forma parti di trafico."

Un situacion comun ta Peaton nan cu ta pone nan bida den peliger ora nan purba di crusa highway, caminda nan hancho (tweebaansweg). Nan ta prefera pasa over di e berm stijl (sero chikito meymey di caminda) cu ta dividi e trafico contrario enbes di crusa unda tin zebrapad. Lubidando cu nan por trompica, herida nan mes y causa accident. 

Ademas Peaton nan bou influencia di alcohol mester comporta nan mes na un manera cu no ta pone nan bida of di otro den peliger. Ley ta indica bou di openbare dronkenschap cu cuerpo policial por tuma e autoridad y decision pa sea hiba e peaton su cas of depende di e peaton su estado e lo wordo deteni y hiba na ward’i polis pa 8 ora. 

AUTOMOBILISTA

Sra. Liliana ta informa cu riba caminda tin borchi nan avisando e automobilista cu nan ta acercando un zebrapad, pa ley nan mester baha velocidad y duna preferencia na tur Peaton cu ta bay crusa riba un zebrapad. 

Por si acaso no tin un zebrapad, e Peaton lo mester para un caminda unda e tin bista riba tur trafico y warda tur auto pasa pa asina e por crusa of e automobilista por baha nan velocidad y duna e peaton un oportunidad pa por crusa riba tempo. 

Sra. Liliana tambe a elabora tocante peaton nan cu ta visualmente incapacita. Corda cu nan no por mira unda tin un zebrapad y pa ley nan ta haci uzo di na stoki blanco door di hisa esaki pa indica cu nan kier crusa. Como automobilista bo por duna e peaton nan aki e oportunidad y preferencia pa por crusa caminda.

MAYORNAN

Como mayor sea cordial ora di baha bo yiu na scol Sra. Liliana ta comenta. No para riba e zebrapad y obstaculisa e fluho di trafico of peaton nan cu kier crusa caminda. Abo ta mayor, abo ta ehempel y e siguridad di e criatura ta den bo man. Para prome cu e zebrapad y laga bo yiu baha sigur na scol of sali un poco mas trempan, parkeer y asisti bo yiu pa crusa caminda.

 

Zebrapadnan ta algo comun den nos bida diario, pero nan ta hunga un rol esencial den proteha e peaton. Sea alerta uzando un zebrapad, y paga tino na e mundo rond dibo. Igual pa automobilistanan, cu mester obedece reglanan di trafico y para pa peaton pa asina nos comunidad keda uno sigur. 

Comision Trafico Sigur ta invita televidentenan pa keda pediente pa e siguiente programa. Otro luna lo tin e di cuater programa di Forum Trafico Sigur den cual lo sigui trece mas informacion di topiconan crucial pa siguridad den trafico. Si bo persona tin cualkier pregunta pa expertonan di trafico, por mandanan via e website www.traficosigur.com of via email na [email protected].  Salba Bida, Scoge pa Siguridad.

  • Powered by SETAR