Fayo a laga por lo menos dos bario henter marduga sin coriente

ORANJESTAD – Un ‘interupcion den e distribucion di coriente den area di Seroe Patrishi y Tanki Leendert’ a pone cu e area nan menciona no tabatin coriente. Asina ELMAR a anuncia den careda di awe mainta 6’or. Problema ta sinembargo, cu ta for di algo despues di mei anochi caba e barionan aki tabata sin coriente. For di 1’or di marduga habitantenan di e barionan afecta tabata sclama riba rednan social di nan disgusto cu no tabatin coriente. Esey a pone cu pa ora cu ELMAR a anuncia pa 6’or di e problema, e disgusto a crece mas ainda, bisandoc ta for di 1’or y no awor e coriente a bay. Danki Dios cu despues di un ora cu ELMAR a anuncia e problema, cu nan por a resolve e problema. Pa 7’08am, ELMAR a raporta cu tur e barionan afecta tabatin coriente bek. 

VARIOS DIA CU PROBLEMA

E siman aki tabatin varios bario y districto cu tabatin problema atrobe cu coriente despues cu pa varios siman e asunto a manera ‘trankilisa’ despues cu den mei, juni y juli, cos a bay foi man cu baymento di coriente. WEB e siman aki tabata e ‘culpabel’ ora cu un corto circuito a pone dos motor grandi di RECIP cay abou, creando e problema den varios districto. Fuera di esey, no ta conoci kico por ta pasando cu atrobe coriente a cuminsa bay den cierto barionan, manera cu nos a conoce algun luna atras. 

Atencion na nos clientenan den e area di Seroe Patrishi, Tanki Leendert: Nos ta confrontando un interupcion den e distribucion di coriente den e area aki. Nos tecniconan ta na e sitio pa atende cu e situacion. Nos lo duna un update asina cu tin mas informacion.