Encuesta di Noticiacla: Partido MEP ta keda grandi y partido FUTURO ta e sorpresa

ORANJESTAD – Den e prome encuesta politico pa 2024 di noticiacla.com (relaciona cu e proximo eleccion parlamentario) teni den forma electronico entre e lectornan di Noticiacla.com, partidonan MEP y FUTURO respectivamente a sali como e vencedornan pa nan respectivo denominacion. MEP como e partido mas grandi y FUTURO como e partido sorpresa. E temanan di e encuesta tabata e.o., Pa cua partido bo lo a vota awor, Si bo ta cla pa vota, y tambe Ki tipo di gobierno bo lo kier.   

PARTIDONAN POLITICO REGISTRA

Den e prome encuesta a inclui tur 23 partido politico cu actualmente ta registra na Censo . Ademas, e encuesta aki no a inclui programa di partido di e partidonan, cu ta nifica cu esnan cu a scohe e partido politico e biaha aki, ta meramente pasobra na ta sostene e partido ‘sin mas’. Conforme e lista aki di 1817 persona cu a participa na e encuesta, 1607 persona a scohe un partido riba e lista, y 210 a opta pa ‘skip’ e parti aki, cu por nifica cu nan no ta sostene ningun di e partidonan aki. 

CUA PARTIDO TA POPULAR 

Entre e 1607 personanan cu a participa den e pregunta di partidonan politico, partido MEP a logra mayoria (53%) sigui pa FuTURo (12%), y AVP (9%). Na di cuater lugar tabatin tres partido cu a keda empata esta RAIZ, ACCION21 y LPR cu 5%. Na di 5 lugar partidonan PPA y CURPA cu 3% y partidonan MAS y RED a keda na di 6 lugar cu 2%. E otro partidonan por mira riba e grafico completo. Tambe tin 5 partido cu a haya solamente 1 voto y 3 partido cu a haya 0 voto. 

CON BO KIER WAK E GOBIERNO?

Un otro pregunta cu a haya hopi atencion,- cu 1178 di e 1817 personanan cu a participa a contesta -, ta con e gobierno mester ta forma. E opcion cu a haya mayoria ta ‘Gobierno di un solo partido, cu 49%. E ta interesante mirando cu mientras cu ta conoci cu esun cu a haya mayoria, esta MEP tabatin 845 voto, tabatin 879 persona a vota pa un gobierno di un solo partido. Esey kier men cu 34 persona mas, cu no a vota pa MEP, tambe kier un gobierno di un solo partido. E siguiente opcion cu a haya mas voto, ta e opcion di un ‘Coalicion entre partidonan chikito so’, cu tabata 25% di e votonan emiti, sigui pa un Coalicion manera cu nos a conoci ultimo tempo’ esta entre un partido grandi y uno chikito, cu ta 21%. E ultimo opcion tabata esun menos popular, cu ta un coalicion entre e dos partidonan grandi. Esaki kier men cu mayoria, no kier wak e dos partidonan ‘grandi y y tradicional’ esta MEP y AVP pa nan traha hunto. 

PROXIMO ENCUESTA

Den e proximo encuesta lo tin solamente e partidonan politico cu a haya derecho pa participa den e proximo eleccion di December 6, 2024, conforme e registro despues di 18 di oktober 2024, cu ta inclui partidonan cu a logra acumula suficiente firma, si nan no tabatin representacion den e ultimo parlamento aki, (Parlamento # 39). 

VOTADORNAN INDECISO 

Mientras cu e segmento cu obviamente a haya mas atencion ta pa cua partido lo bo vota, e loke a hala atencion tambe ta entre otro e grupo indeciso pa sea bay vota, of sa pa ken nan lo vota. Entre nan a sali cu 13% di 1804 persona cu a contesta e pregunta ey, 13% no sa pa ken nan vota ainda, mientras cu ora cu a puntra si bo ta bay vota, e cantidad a aumenta na 1812 persona unda cu aki 4% a bisa cu nan no sa cu nan lo vota ainda. 

KEN A VOTA KICO SEGUN DISTRICTO

Tambe loke ta interesante ta e parti demografico di esnan cu a participa den e encuesta. Sigur pa loke ta e partidonan nobo. E partidonan ‘tradicional y ya existente’, e informacion no ta mucho nobo. P.e. MEP ta mas popular den Sta Cruz segun e encuesta (215 di e votonan osea 12%) y menos den San Nicolas (74 osea 4.1%). Partido FUTURO cu ta nobo, ta mas fuerte den Paradera (46 voto osea 3%), y menos den Savaneta (9 voto osea 2%). Partido AVP ta mas popular den Oranjestad (41 voto osea 2.3%) y menos den Savaneta y San Nicolas (osea 1%). ACCION21 ta mas popular den Oranjestad (25 voto osea 1.4%) y menos den Savaneta (2 voto osea 0,1%). LPR ta grandi den Noord (22 voto osea 1.2%) y menos den Savaneta (4 voto osea 0.2%). RAIZ ta grandi den Oranjestad (22 voto osea 1.2%) y menos den Savaneta (5 voto osea 1%). Partido MAS ta grandi den Noord (11 voto osea 1%) y menos den Sta Cruz (4 voto osea 0.2%), y PPA ta grandi den Playa (12 voto osea 1%) y menos den Savaneta (3 voto osea 0.2%. Mester bisa cu despues cu Otmar Oduber a anuncia cu e la tuma e partido PPA over, a nota cu e votonan pa e partido ey a aumenta un tiki. 

PARTIDONAN SEGUN EDAD

Tambe den e parti di edad, ta interesante pa e partidonan ‘nobo’ sa cua edad ta identifica miho cu nan. Aki tin p.e. MEP cu ta identifica miho cu e grupo di 55-64 aña, FUTURO mas cu e edad di 35-44 aña, AVP, PPA y MAS ta registra bon cu e edad 65 aña- y mas, y ACCION21 y RAIZ ambos ta registra bon den e edad 35-44 aña. Partido LPR ta registra miho entre e grupo di 45-54 aña di edad. 

DISCLAIMER

Manera tur encuesta di Noticiacla, e resultado aki tambe ta anonimo, y no scientifico. Ademas Noticiacla ta conciente cu esaki ta un encuesta electronico pues solamente acesibel na esnan cu tin internet y cu primordialmente ta sigui Noticiacla.com.  E encuesta a core di diamars 17 di September 2024 pa diasabra 21 di September 2024 den cual un total di 1817 persona a participa.