Premier Wever-Croes ta den Cumbre di Futuro na Nacionan Uni e weekend aki

NEW YORK - Prome Ministernan Evelyn Wever-Croes di Aruba y Luc Mercelina di Sint Maarten ta participa den e Cumbre di Futuro den nomber di Reino pa cual e lo lidera esaki tambe como cu Reino Hulandes tin e vice presidencia di esaki. Banda di esaki vice Prome Minister Gumbs di Sint Maarten lo representa Reino durante e reunionnan di Alto Nivel riba subida di nivel di lama y resistencia antimicrobiano.

E prome mandatario di Aruba lo forma parti di e delegacion di Reino Hulandes cu e.o. Prome Minister Schoof, Minister Veldkamp di Relacionnan Exterior y Minister Klever pa Comercio Exterior y Ayudo pa Desaroyo cu despues lo participa den e di 79 Asamblea General di Nacionnan Uni (UNGA) na New York otro siman. Aruba su participacion lo ta solamente e fin di siman aki y despues e prome mandatario ta bolbe Aruba dialuna mes. 

E RESTO DI DELEGACION

Prome Minister Hulandes Dick Schoof lo yega diamars anochi, dia 24 di september, y seguidamente lo topa cu representantenan di companianan Hulandes durante un cena. Diarason 25 di september Prome Minister Schoof lo tin varios consulta bilateral cu hefenan di estado y gobierno durante dia y lo ta presente den oranan di atardi na e evento di Su Mahestad Reina Maxima tocante financiamento inclusivo pa desaroyo. Den oranan di anochi, Prome Minister lo asisti na un recepcion pa presidente Mericano Biden.

Promé Minister Schoof lo dirigí su mes na UNGA diahuebs 26 di september proximo. Tambe e tin un reunion cu secretario general Guterres di Nacionnan Uni, consultanan bilateral cu diferente hefe di estado y gobierno y discusionnan cu representantenan di companianan Mericano.

Minister Veldkamp ta henter siman na New York. E lo asisti na diferente reunion ministerial riba entre otro e situacion na Medio Oriente, contra terorismo y siguridad maritimo. E minister lo tuma parti tambe na un evento riba husticia pa Ucrania. Minister Veldkamp ta presidi e reunion ministerial di Freedom Online Coalition, di cual Hulanda ta presidente e aña aki. Tambe e minister lo participa na un evento co-organisa pa Hulanda riba husticia pa Sudan, y un reunion di e Grupo Nucleo LGBTI di cual Hulanda ta co-presidi.

Minister Klever lo participa na UNGA di 23 pa 25 di september proximo. E ta presente na e evento di Su Mahestad Reina Máxima riba financiamento inclusivo pa desaroyo. Tambe e minister ta topa cu otro ministernan y representantenan di companianan Hulandes activo na Merca y di organisacionnan di Nacionnan Uni, manera Alto Comisario pa Refugiadonan. Tambe Minister Klever lo hiba un discurso di apertura na un reunion tocante siguridad di cuminda. Tambe e minister lo papia durante un evento tocante migracion y recepcion den region.