Fundacion Cultuurfonds Caribisch Gebied (CCG) a celebra 70 Aña

Posted on 09/20/2024 9:45 am AST | Updated on 09/20/2024 9:45 am AST

ORANJESTAD – E Fundacion Cultuurfonds Caribisch Gebied (CCG) a celebra cu orguyo su 70 aña, marcando otro decada di contribucion cultural y desaroyo den nos comunidad. Un di e momentonan mas emocional tabata e despedida di Lourdes Croes, cu a dedica 30 aña di servicio voluntario na e fundacion. Su compromiso incansabel y pasion pa preservacion cultural a laga un marca inolvidabel riba e organizacion y riba e comunidad en general.

Fundacion “het Cultuurfonds Caribisch Gebied (CCG)”, antes conoci como “Prins Bernhard Cultuurfonds Caribisch Gebied”, a lansa un campaña pa anuncia nan cambio di nomber. Den e fin di siman di 6 y 7 di september a tene e reunionnan plenario di e directiva pa cai huntu cu Art Week y Art Fair, cual ta un iniciativa cu tambe a conta cu sosten financiero di e fundacion. E reunionnan tabata sigur special pasobra ta e prome biaha cu e presidente nobo, Lionel Janga a dirigi un reunion plenario riba 6 di September. Como punto special, Lourdes Croes, miembro di Aruba y vice presidente di e fundacion a presidi riba e reunion día 7 como su ultimo reunion oficial.

Riba 6 di september a tuma lugar un recepcion chikito den e hofi di hotel Astoria na Sanicolas pa celebra y refleha riba e legado di e fundacion, unda tambe a introduci e miembronan nobo di e directiva diario. E celebracion a reuni ex-miembronan di directiva di Aruba, y ex-receptornan di Premio di Cultura, un premio cu ta ser entrega cada tres aña na figura cultural destaca di e isla.

Tabatin discursonan emocional di despedida for di e presidente señor Lionel Janga y e directora di oficina, señora Melanie Sloot, kende a comparti su recuerdonan trahando cu "Des," un miembro cu semper a mustra serenidad y sabiduria den momentonan di reto cu e fundacion a pasa aden. Des ta ser recorda como un lider accesibel y calmo. Tambe e señora Cathelijne Broers, directora di “het Cultuurfonds” di Hulanda, a manda bunita palabranan di despedida pa medio di un video. Miembronan di directiva di CCG a expresa na Des cu por lo pronto nan lo sigui den contacto pa consehonan valioso pa sigui eleva e fundacion.

E organisacion ta avansa cu un imagen nobo y un nomber actualisa, reflehando e mes dedicacion fuerte pa sirbi e tereno cultural di Aruba y otro isla den Caribe Hulandes. Nos ta traha pa bira mas accesibel cada dia pa creativonan y esnan cu ta defende naturalesa, y pa esnan cu ta busca fondonan pa nan esfuerso cultural y conservacion di naturalesa. Nos lo comunica mas intensivo cu nos campo den e dianan cu ta bini y nos ta spera pa sigui yuda nos peticionarionan mas tanto cu ta posibel cu realisacion di nan proyectonan.

Plataforma Pashentnan di Aruba a keda lansa oficialmente
ORANJESTAD - Dia 28 di februari a tuma lugar e lansamento oficial di Plataforma Pashentnan di Aruba. Sr. mr.dr.Jayburtt Dijkhoff cu ta presidente di Fundacion SIKI a enfatisa cu esaki ta un evento historico pa Aruba. Ta trata di un plataforma unda cu tur pashent di Aruba por expresa nan preocupacion- y remarcanan pa asina contirbui na un mihor cuido medico. Fundacion SIKI ta un organisacion non-profit cu ta boga pa empodera e individuo y stimula cambio social positivo. E ta haci esaki a travez di curso, investigacion y avtividadnan cu ta trece cambionan constructivo den sociedad. Un tema di enfoke di e fundacion ta e derechonan di pashent. A publica un buki y a duna hopi charla gratis pa stimula esaki, pero a yega tempo pa bai pa e siguiente nivel. P'esey a yega na un plataforma di pashent. Aruba no ta cla ainda pa un asociacion of federacion, pero si ta cla pa participa y contribui den un forma liber y igual pa tur persona. E plataforma ta logra su funcion pa medio di 3 punto: 1) un vocero pa pashent, 2) un pataforma digital y 3) centralisa e organisacionnan di pashent. Sr. Dijkhoff a presenta e vocero di Plataforma Pashentnan di Aruba, kende ta sra. Nurianne Arias. Sra. Arias ta un docente den maneho adminstrativo na Universidad di Aruba, ta studiando pa su PhD, y ta un activista pa cuido di diabetes y pashentnan en general pa hopi aña. E escohencia pa un profesional di e caliber aki no tabata dificil, specialmente mirando e pasion cu sra. Arias tin pa e pashent y su cuido. Sra. Arias lo fungi como e bos di e pashentnan di Aruba den cuadro di combersacion y dialogo cu entre otro 'Kwaliteitsraad' di Gobierno y otro entidad di salud di Aruba. E Kwaliteitsraad ta un organo nobo den cual tur reglanan tecnico y consehonan importante tocante cuido di salud ta wordo formalisa. Awor e Plataforma Pashentnan di Aruba ta drenta e fase di sigui plama e noticia aki y encurasha tur hende pa join e grupo aki riba Facebook groups: Pashentnan di Aruba. Tambe lo bai planea pa invita tur e organisacionnan di pashent join un otro canal di e plataforma. Adicionalmente ta preparando pa acerca hendenan grandi cu no tin facebook pa join via un canal alternativo. Esaki lo wordo anuncia pronto.
Mas Social
Lesa Mas
A.T.A. a celebra su aporte significativo durante Carnaval 71
ORANJESTAD - Aruba Tourism Authority (A.T.A.) ta mira atras riba su participacion integral den e temporada di Carnaval 2025, brindando sosten pa eleva e nivel di e experiencia pa tanto e comunidad local como nos huespednan. Manera añanan anterior, A.T.A. orguyosamente a brinda su apoyo na SMAC como e organo cu ta organisa Carnaval den su totalidad y ta crea eventonan vibrante y dinamico durante henter e temporada di Carnaval. Alabes, a duna sosten na Stichting MUSICA, un fundacion cu ta promove e desaroyo di talento musical local y asegura cu e enfasis riba nos musica y ritmo di Carnaval ta keda uno presente y relevante.
Mas Social
Lesa Mas
Stichting Musica a anuncia Band of the Year pa 2025
ORANJESTAD - Stichting Musica a scohe Groove Masters como Band of the Year pa 2025. Segun Musica, Groove Masters a destaca durante di e evaluacion di hurado y como Band of the Year ta gana e suma di Afl.5000,- como premio. Groove Masters a destaca cu un bon calidad di sonido, tremendo animacion cu un repertorio di cancion nobo y clasico y cu un presentacion cu a impresiona nos comunidad en general.
Mas Social
Lesa Mas
Kiwanis Club of Aruba a celebra 60 aña di existencia
ORANJESTAD - Dia 21 di februari ultimo e miembronan di Kiwanis Club of Aruba a celebra 60 aña di existencia na La Cabana Beach Resort & Casino. Invitado special pa e jubileo aki tawata Gobernador di Aruba, S.E. Sr. Alfonso Boekhoudt cu a wordo ricibi cu un caluroso bon bini den e ballroom door di Presidente Tessely Koolman-Ranis y tambe Sr. Pierre Kock, F&B director di La Cabana Beach Resort & Casino, hunto cu tur miembro presente.
Mas Social
Lesa Mas
Aeropuerto di Aruba a premia monarcanan y finalistanan di Carnaval 71
ORANJESTAD – Aruba Airport Authority N.V. (AAA) a honra e monarcanan y e finalistanan di carnaval 71 di Aruba. “Carnaval ta un evento iconico cu ta resalta e cultura rico di Aruba, uniendo nos comunidad den un celebracion alegre”, asina Marylin Feliciana, Marketing & Communications Manager na AAA a expresa. Feliciana a continua bisando: “Carnaval ta mas cu djis un festividad—e ta un expresion di nos comunidad. E ta mustra nos musica diverso, talento y hospitalidad caluroso na mundo. Na AAA, nos ta orguyoso di ta parti di e celebracion cultura aki y di sostene su crecemento pa futuro generacionnan.”
Mas Social
Lesa Mas
A.T.A. a honra Massive Brass Band pa ta e.o. representa Aruba internacionalmente
ORANJESTAD - Aruba Tourism Authority (A.T.A.) a honra Massive Brass Band pa nan contribucion na e tradicion musical di Aruba, cu ta Asambeho. Funda na 2015, y bou guia di Roderich Lopez, Massive Brass Band ta ser considera como un gran parti di e historia musical di Asambeho na Aruba, cu presencia constante den festivalnan local, paradanan den Carnaval di Aruba, Island Festival na San Nicolas y mas. Ta di menciona cu e aña aki ta bira e prome biaha cu Massive Brass Band tin e honor di habri paradanan di carnaval.
Mas Social
Lesa Mas