Prome minister Pisas di Corsou tabatin audencia cu Papa Francisco na Vaticano

WILLEMSTAD/ CUIDAD VATICANO - Promé Minister Sr. Gilmar Pisas tabata di bishita na Vatikano i a keda risibí den oudiensia ku Papa Fransisko dia 18 di sèptember 2024. Durante di tur e enkuentronan aki Promé Minister sr . Pisas a keda kompaña pa Mgr. Luis Secco Obispu di Willemstad i Pastor Curtis Meris.

Esaki no ta promé biaha ku un Promé Minister di Kòrsou ta keda risibí den oudensia serka Papa Fransisko. Na 2015 Sr. Ben Whitman ex-Promé Minister di Kòrsou tambe a hasi un biahe similar.

Meta di e bishita aki ta pa por sigui krea mas kolaborashon entre Gobièrnu di Kòrsou i Iglesia Katóliko riba tema di mutuo atenshon pa e desaroyo di pueblo di Kòrsou. Sigur mirando e ròl positivo di Santa Sede Vatikano – Iglesia Katóliko

komo un di esnan ku ta enbolbí rònt mundu den desaroyo di e ser humano i ku ta den bon relashon ku mas di 183 paisnan ront mundu. Durante di e bishita na Roma Promé Minister sr. Pisas tabatin e oportunidat tambe pa reuni ku su Eminensia Cardinal Michael Czerny e prefekto responsabel pa e dikasteria di Desaroyo Integral Humano pa Santa Sede i su ofisialnan.

A atendé diferente tópikonan durante di e bishita aki manera entre otro pobresa, migrantenan, salubridat, krisis humanitario, kambio klimátiko, inigualdat ekonómiko, kon pa promové dignidat di hende i desaroyo holístiko di e hende.

Tambe Promé Minister sr. Pisas tabata tin reunion ku su ekselensia Arsobispu Paul Gallagher kende ta Minister di Relashonnan Eskterior di Santa Sede Vatikano. Durante di e enkuentro aki Promé Minister sr. Pisas i su ekselensia Gallagher a atendé tópikonan manera e situashon na Venezuela, e relashon entre Hulanda i Kòrsou, proyektonan ku ta keda ehekutá via di Obispado di Willemstad, e koperashon entre Gobièrnu di Kòrsou i Iglesia Katóliko na Kòrsou.