Wever: Trabounan di restauracion Caw Veneranda ta inicia e siman aki

ORANJESTAD - Durante un evento di Monumentendag diadomingo, a habri porta di Cas Veneranda brevemente pa un publico presente. Organisa pa Stichting Monumentenfonds, arkitecto Daphne Every a duna un presentacion di e historia di Cas Veneranda, y un splicacion di e trabounan cu ta bai haci cuminsando e siman aki. 

Despues di basta preparacion, cuminsando e siman aki lo cuminsa mira actividad na Cas Veneranda. E prome paso den preparacion tabata e firmamento di e koopovereenkomst cu e famia di e doño original y firmamento di e huurovereenkomstnan. Departamento di Asuntonan Economico, Commercio y Industria (DAECI) lo ta e huurdo principal, y tambe lo tin un etablecimento di horeca den e pida na banda di Schoolstraat. 

E ubicacion di DAECI den centro di Oranjestad ta forma parti di e maneho di Minister Geoffrey Wever pa trece bida bek centro a traves di amplifica e fluho di personanan cu ta frecuenta e area. Esaki ta importante pa realisa e revitalisacion di Oranjestad. 

Entre otro tin diferente proyectonan den planificacion cual pronto mester cuminsa, manera e edificio di Ministerio Publico cu ta bai ser converti den vivienda pa studiante, y edificio di ex-Interbank caminda lo haci trabounan di renobacion, y lo ubica Bureau Intellectuele Eigendom (BIE) y SEDECO den dicho edificio. Minister Geoffrey Wever a indica di ta tumando pasonan concreto dentro di su control pa por mehora e clima empresarial den e area, y ta mustra cu sector priva tambe ta siguiendo e pasonan aki cu inversionnan cuantioso den ful e area di Oranjestad.

E trabou di restauracion ta plania pa cuminsa di 23 di september, y lo termina fin di november 2025.