Hulanda a informa Aruba te despues cu Gonzalez a sali for di Venezuela

ORANJESTAD – Prome minister di Aruba Eveyn Wever-Croes a wordo informa di e salida di Edmundo Gonzalez for di Venezuela ora cu ya e la bandona Venezuela. “Ami a wordo informa diadomingo mainta despues di e candidato di oposicion ya a sali pa Spaña caba” Wever-Croes a contesta Noticiacla riba e pregunta. Esaki tabata importante pa Aruba mirando cu Aruba pa asuntonan internacional ta cay bou di Hulanda y cu cualkier accion di Hulanda por afecta Aruba. E mandatario ta mustra di no tabata mucho contento cu e forma con cos a bay. “  Mi a puntra Hulanda dicon nan no a avisa nos prome y nan a informa cu pa seguridad di e staf y personal si embahada, e noticia aki a keda solamente den un grupo hopi chikito” e mandatario a finalisa bisando. Esaki ta interesante pasobra tin informacion cu Corsou, no tabata na altura mes, y no ta conoci si ey tambe ta despues di e hecho, nan a wordo informa. 

E SITUACION 

Manera cu Noticiacla a raporta dialuna caba, lider di oposicion Venezolano Edmundo González a yega Spaña dialuna tempran. El a baha hunto cu su casa na un aeropuerto militar den e region di Madrid, e emisora ​​publico Spaño TVE a informa. Diadomingo mainta a anuncia cu González a huy for di Venezuela. El a haya asilo politico na Spaña.

Representante exterior di UE, Josep Borrell, a bisa den un comunicado cu tabata “un dia tristo” pa Venezuela. “UE ta urgi e autoridadnan Venezolano pa caba cu e reprecion y aresto arbitrario di figuranan di oposishon,” el a scirbi.

ALOHAMENTO NA EMBAHADA HULANDES

González ta wordo acusa di sedishon y conspiracion, entre otro, despues di su declaracion di cu el a gana e eleccionnan presidencial na fin di juli. Un ordo di detencion a keda emití p’e diamars ultimo.E lider di oposicion no a aparece mas den publico despues di e reeleccion di presidente Maduro. El a keda secretamente aloha den e embahada Hulandes na Caracas pa mas di un luna, Minister Veldkamp (NSC) di Relacionnan Exterior a scirbi Camara di Representantenan awe. Segun e, Gonzalez mes a pidi esaki.Na fin di juli, mi a ricibí un peticion urgente di Sr. González, kende a sintie seriamente menasa y tabatin miedo di persecucion político,” Minister Veldkamp a bisa NOS. For di fin di juli te cu fin di siman pasa, Gonzalez a hospeda na e residencia di e embahada na Caracas."Como Hulanda, nos ta para pa democracia, derechonan humano i estado di derecho. Ta p'esei nos a ofrece hospitalidad na un hende cu tabata den peliger conkreto di persecucion político. Esei ta importante den e caso aki," Veldkamp ta bisa. E hecho cu Hulanda ta un bisiña di Venezuela a traves di e islanan Caribense di Aruba, Bonaire y Curaçao tambe a hunga un rol den e decision, segun e minister.

 A bai riba su mes inisiativa

E  ta enfatisa cu González a bandona e residencia riba su propio iniciativa. “El a indica cu e kier bay, pesey mi a papia cune pa scucha su consideracionnan”, Veldkamp a bisa. E lider di oposicion tambe por conta cu hospitalidad Hulandes den futuro, e minister ta bisa.

E vice presidente di Venezuela Rodríguez ta bisa cu González di 75 aña tabata den e embahada Spaño na Caracas den e ultimo dianan. Ta ser bisa cu gobierno Venezolano a coopera den su salida. Lider di oposicion María Corina Machado, ken a wordo prohibi di participa de eleccion pa Corte Supremo Venezolano den preparacion pa e eleccionnan, ta skirbi riba X cu González tabata teme pa su bida si e keda na Venezuela pa un periodo mas largo.