Art Week a yega y ta yena caya di San Nicolas di moda, musica y arte

Posted on 09/3/2024 9:32 am AST | Updated on 09/3/2024 9:32 am AST

SAN NICOLAS  – Prepara pa drenta den un mundo yena di color, creatividad y cultura den loke ta Art Week Aruba 2024 cu ta cuminsa di dia 2 y ta core te diadomingo 8 di september y ta transforma e ciudad di San Nicolas den un galeria na aire liber ademas di e develo di varios mural nobo cu ya caba ta halando hopi atencion mientras ta keda cla.

E aña aki, Art Week Aruba no ta djis un oportunidad di admira arte – bo ta un testigo di con arte ta haya bida. Artista renombra di Aruba y di exterior ta trahando duro riba nan muralnan, na diferente punto di e ciudad, cu ta casi cla pa nan gran debut. E obranan maestro aki nota djis pintura, nan ta expresionnan poderoso di comunidad, identidad y imaginacion, cada un contando un storia unico cu ta refleha e herencia y energia di pariba di brug.

Algun di e artistanan invita pa e edicion di e aña’ki y cu ta trahando actualmente riba nan creacion pa San Nicolas, ta Studio Giftig di Hulanda, Rosie Woods di Reino Uni, Carlos Alberto di Mexico, Chemis di Republica Checo, Sabotaje al Montaje di Spaña, banda di nos talentonan local manera Armando Goedgedrag, Paul Wong, Robby Solognier cu asistencia di Alex Koolman y Omaira Silva.

Pero esey no ta tur! Art Week Aruba ta priminti di ta un experiencia inolvidabel pa tur amante di arte cu demostracionnan en bibo caminda bo por mira sesionnan di pintamento, instalacionnan interactivo, y presentacionnan espontaneo cu lo laga bo babuca; encuentro cu artistanan caminda por conoce e muralistanan y otro artistanan participante, cu ta comparti nan inspiracion y tecnica; biba e experiencia gastronomico, musical y cultural disfrutando di platonan local, musica en bibo y explorando e mercado di artesanonan cu ta celebra e cultura diverso di e comunidad Arubano.

E punto maximo di e siman lo ta Art Fair; tres dia durante cual ta presenta tur mural, pero tambe e cayanan ta haya bida cu creatividad y inspiracion di diferente pintor, escultor y artesano. Esaki ta bo chens di presencia historia di arte! Detaye tocante e eventonan Art Table, Art Fashion y Art Fair ta obtenibel na https://artweekaruba.com/aruba-art-fair/. Pa mas informacion sigui nos riba social media na @Arubaartfair y @Artfashionaruba pa update y sneak peeks.

Art Week Aruba ta organisa pa Pure Events Aruba Foundation hunto cu Aruba Tourism Authority. Un danki special ta bay na tur patrocinado manera Prins Bernhard CultuurFonds, Mondriaan Fonds, Departamento di Cultura Aruba, Cas di Cultura, La Cabana Beach Resort & Casino, Unoca, Marriott Aruba Resort & Stellaris Casino, L’Oreal Aruba y Romar Trading, Eagle Aruba Resort y Elite Productions & De Palm Tours, kende nan sosten ta instrumental den e realisacion di Art Week Aruba 2024.

  • Powered by SETAR